O Concello concede licenza para a construción de 150 novas vivendas en Xuxán que se destinarán a alugueiros sociais

Tamén este mércores, a Xunta de Goberno Local aprobou os permisos para erguer dous edificios na Cidade das TIC, que albergarán dous novos platós audiovisuais nunha superficie total de 6.640 metros cadrados

O concelleiro de Economía e Planificación Estratéxica, e voceiro do Goberno municipal, José Manuel Lage, informou esta mañá da concesión de dúas licenzas á cooperativa Galivivienda para acometer a construción de 150 novas vivendas en dúas parcelas do barrio de Xuxán, vivendas que estarán destinados a alugueiros sociais.

Foi un dos asuntos máis destacados na orde do día da Xunta de Goberno Local, convocada este mércores en sesión ordinaria. Lage apuntou que, coa concesión destas dúas licenzas, “o Goberno de Inés Rey reforza a liña que está a seguir na súa política de vivenda e que contribúe a incrementar o parque de vivenda en alugueiro na cidade, especialmente o de carácter social”.

O primeiro dos edificios que promove Galivivienda está situado na parcela Z27 e contará con 90 vivendas cos seus correspondentes rochos, garaxes e locais comerciais. O segundo bloque, tamén situado en Xuxán, na parcela Z40, achegará outras 60 vivendas. Os dous edificios teñen un prazo de execución de 36 meses e suman, no seu conxunto, un orzamento de 5,7 millóns de euros: 3,5 millóns o primeiro e 2,2 millóns o segundo.

Lage lembrou que, actualmente, o Concello ten en execución as obras de construción doutro bloque de 50 vivendas para alugueiro social en Xuxán, “e vimos de convocar un concurso público para destinar a ese mesmo fin outras tres parcelas das que o Concello é titular”.

A Cidade das TIC contará con dous novos estudios audiovisuais

Dándolle continuidade ao apartado de licenzas, hoxe tamén se aprobou o permiso municipal para construír dous novos edificios, dedicados a estudios audiovisuais, na Cidade das TIC. Os novos estudios, promovidos por Pedralonga Audiovisual, súmanse ao estudio inmersivo xa existente.

Ocuparán dúas parcelas que suman 6.640 metros cadrados, contan cun orzamento de execución conxunto de 4,1 millóns de euros e un prazo de execución de 36 meses.
“Estas actuacións reforzan o carácter da Cidade das TIC como polo estratéxico nos sectores do audiovisual e das novas tecnoloxías. Confirma o interese que está a espertar no sector un espazo que xa é referente en Galicia, e que o será aínda máis nun futuro, da man do rico tecido empresarial tecnolóxico existente na Coruña e na súa área, e tamén de organismos como a AESIA, en funcionamento xa na nosa cidade grazas ás xestións levadas a cabo por Inés Rey diante do Goberno de España”, destacou Lage.
Neste sentido, a Cidade das TIC vivirá mañá a sesión constitutiva do Consello de Administración da súa sociedade xestora, conformada polo Concello e a Universidade da Coruña co obxectivo de dinamizar e marcar a folla de ruta para impulsar as instalacións de Pedralonga e de abrir camiño a emprendedores, sinerxías empresariais e iniciativas en materia de investigación.

Tal e como explicou hoxe Lage en rolda de prensa, o reitor da UDC, Ricardo Cao, presidirá o Consello de Administración ao longo deste ano, e será a partir do 1 de xaneiro de 2026 cando collerá o seu testigo a alcaldesa, Inés Rey.

193 expedientes urbanísticos tramitados na última quincena

Dentro do apartado de licenzas, nesta Xunta de Goberno Local concedéronse un total de 193, das que 14 foron licenzas urbanísticas, 101 obras en réxime de comunicación previa, 47 licenzas de apertura tamén en comunicación previa e 18 permisos de apertura por declaración responsable.
Entre os expedientes tramitados, destaca, pola súa contía, a licenza concedida para acometer a mellora da envolvente e a substitución da cuberta dun conxunto de bloques residenciais na avenida do Ferrocarril, cun investimento total de 1,9 millóns de euros.

Ademais, tamén en materia de urbanismo, hoxe aprobouse a declaración de ruína de dúas construcións situadas no lugar de Cabana, en Someso, “e que nos últimos tempos se transformaran en potenciais focos de insalubridade. Actuamos de xeito decidido, como se fixera antes noutros puntos da cidade, como o lugar de San Xosé, para lle pór fin a esa situación”, explicou José Manuel Lage.

Luz verde ao reformado do proxecto das Casas de Franco

Tamén este mércores, a Xunta de Goberno Local aprobou o reformado do proxecto das denominadas Casas de Franco. A obra suporá, finalmente, un investimento de 646.991 euros, en torno a 100.000 euros máis dos inicialmente previstos.
“Esta reforma do proxecto foi precisa para dar resposta ás peticións que nos facían os veciños e que finalmente foron engadidas ao documento, obrigando a modificalo, trámite que cumprimos agora”, precisou José Manuel Lage.
302.000 euros en tres anos para o servizo de control de aves

Finalmente, a Xunta de Goberno Local acordou tamén adxudicar á empresa Larus Control o contrato de control de aves dentro do termo municipal. A compañía percibirá 302.000 euros durante tres anualidades.

As empresas de control de aves fanse cargo do control da poboación de aves na cidade, así como da retirada de niños de gaivota cando é preciso, tanto en edificios públicos como privados.