O PP de Culleredo recolle as queixas dos veciños de Fonteculler “fartos da deterioración do seu barrio e do abandono por parte de Rioboo”.

∙ Os populares esixen ao goberno local que asuma responsabilidades e solucione de inmediato os problemas de infraestruturas e servizos que afectan á zona.

∙ Izaskun García: “A situación do Parque dás Brañas é un escándalo tras anos de inacción e falta de responsabilidade por parte do goberno local”.

O Partido Popular de Culleredo continúa a súa rolda de encontros veciñais “Rúa a rúa, escoitando”, esta vez en Fonteculler, unha das zonas máis poboadas do municipio. A reunión contou cunha gran asistencia e serviu para constatar o profundo malestar dos veciños #ante o deixamento do goberno local, encabezado por José Ramón Rioboo.
Prazas en mal estado, inseguridade viaria, parques infantís deteriorados, falta de limpeza e servizos insuficientes son só algunhas das preocupacións que os residentes trasladaron aos populares na reunión celebrada onte no Centro Cívico Virginia Blanco.

Os veciños denunciaron especialmente o pésimo estado da Praza Daniel Rodríguez Castelao, Santa Xema e o Parque dás Brañas. “O risco de caídas nestas prazas é altísimo debido aos pavimentos gretados e sen mantemento. A isto súmase que, nunha zona cunha poboación de máis de 3.000 persoas, só conte con catro randeeiras e dous tobogáns, e algúns nin sequera son seguros para os nenos”, sinala a portavoz popular, Izaskun García.

Ademais, a situación do Parque dás Brañas segue sendo un escándalo. “Desde que en 2020 derrubouse a cuberta que estaba a piques de inaugurarse, os restos estiveron no chan ata 2023, e a día de hoxe, ninguén asumiu responsabilidades. É indignante que os veciños sigan pagando as consecuencias da incompetencia de Rioboo”, denunciou García. “A esta vergoña hai que sumarlle deficiencias no sistema de pluviais e a desaparición dos pivotes que impedían o acceso dos vehículos ao parque, o que aumenta o risco para os peóns”.
“A falta de limpeza e mantemento é outro foco de preocupación que nos trasladaron os veciños”, asegura a líder popular. “A acumulación de lixo e a ausencia de roza en zonas axardinadas favoreceron a proliferación de ratas, e a acumulación de excrementos de aves en Praza Castelao agrava aínda máis a sensación de abandono na zona”, recalca a portavoz.

O centro cívico onde se celebrou a reunión tampouco se libra das queixas. “É inaceptable que este edificio careza de accesibilidade. Para acceder á planta superior hai que saír ao exterior, o que supón unha barreira para moitas persoas”, criticou García.
#Ante esta situación, o Partido Popular de Culleredo comprométese a seguir defendendo os intereses dos veciños e a esixir respostas inmediatas ao goberno municipal. “Non imos deixar de pelexar por Fonteculler. Os veciños están fartos do abandono e merecen solucións, non escusas. Imos seguir aquí, escoitándoos e levando as súas demandas onde faga falta”, concluíu Izaskun García.