Laxe aposta polo aforro: o Concello  únese ao acordo da FEMP para  rebaixar a factura da luz 

A medida permitirá unha contratación máis  eficiente da electricidade en alta e baixa tensión,  aforrando miles de euros ás arcas municipais 

O Concello de Laxe vén de iniciar o  procedemento para adherirse ao convenio da FEMP (Federación Española de Municipios e Provincias) para a contratación do subministro de  electricidade en alta e baixa tensión a través da súa Central de Contratación.  A decisión, promovida polo equipo de goberno que lidera o alcalde D.  Francisco Charlín Oróns, permitirá obter mellores condicións económicas  

no contrato da luz e unha importante redución do gasto enerxético municipal. 

Este procedemento realizarase mediante a fórmula do acordo marco, un sistema que  garante prezos máis competitivos e unha contratación máis áxil, cumprindo coa normativa  vixente de contratación pública (Lei 9/2017, de Contratos do Sector Público). A duración  inicial do acordo é dun ano, prorrogable ata un máximo de catro anos, e permitirá ao  Concello beneficiarse das mellores ofertas dispoñibles grazas á licitación realizada pola  FEMP en beneficio das entidades locais asociadas. 

O importe anual estimado do contrato sen IVE ascende a 185.950,41 euros, sendo o IVE  correspondente 39.049,59 euros. A execución do contrato basearase nos pregos de  cláusulas administrativas e prescricións técnicas establecidos pola Central de  Contratación. 

Con esta medida, o goberno municipal segue avanzando cara a unha xestión máis  eficiente e sostible dos recursos públicos, priorizando o aforro económico e a  modernización dos servizos municipais.