O Ágora acolle este sábado o primeiro Torre 67 Fest, un concurso de música moderna da Escola Municipal

A alcaldesa presidirá o xurado neste evento que se celebrará a partir das 18.00 horas no auditorio

O auditorio do Centro Sociocultural Ágora acollerá este sábado a primeira edición do Torre 67 Fest, o novo proxecto da área de música moderna da Escola Municipal de Música da Coruña. A alcaldesa, Inés Rey, exercerá como madriña e presidenta do concurso, que comezará ás 18.00 horas, e todas as entradas están esgotadas.
“Esta iniciativa amosa que a nosa Escola Municipal de Música está máis viva ca nunca, apostando por achegar aos recintos culturais da cidade o traballo diario dos seus alumnos e alumnas”, apuntou a alcaldesa. O nome deste certame adopta a dirección da Escola, situada no número 67 da rúa da Torre, no barrio de Monte Alto.

A finalidade deste concurso é fomentar, impulsar e dinamizar todas as actividades que se realizan no centro e amosar o traballo dos e das alumnas nas aulas. Participarán oito combos de música moderna e todos eles están integrados por alumnado da Escola. A formación gañadora será a que represente este ano á área de música moderna na Gala da Escola de Música Municipal, que se celebrará o vindeiro 4 de abril no Teatro Colón.

Os combos actuarán, un a un, sobre o escenario do auditorio e ante a presenza do xurado presidido pola alcaldesa. Ademais, tamén haberá unha votación do público mentres o xurado delibera. Entregaranse primeiro, segundo e terceiro premio, ademais do premio do público.