Fene, Mugardos e Neda impulsan ata maio un ciclo de charlas para axudar ás familias a previr as adiccións na mocidade

O programa socioeducativo “Máis que un teito”, promovido polos concellos de Fene, Mugardos e Neda, ofrecerá de aquí ao mes de maio media ducia de charlas destinadas a pais e nais con fillos e fillas menores dos tres municipios. O obxectivo fundamental non é outro que acompañalos na educación e mellorar a prevención das condutas adictivas da mocidade. As familias xa poden inscribirse nas sesións que sexan do seu interese.

A proposta chega, no caso de Neda, en paralelo aos obradoiros que ao alumnado terá nos centros de ensino. Serán en total seis charlas participativas, nas que se resolverán as dúbidas formuladas polos proxenitores, buscando reforzar a información que teñen as familias a nivel emocional e facilitándolledo pautas de actuación destinadas a detectar condutas de risco.

O ciclo, que se desenvolverá na Casa da Cultura de Fene, arrancou a semana pasada cunha xornada sobre a preadolescencia e a adolescencia, e terá continuidade este luns, a partir das 18.30 horas, cunha sesión centrada na “Prevención ou abordaxe dos conflitos nas familias”, dirixida pola psicóloga e educadora de disciplina positiva Andrea Bechlian.

No mes de abril haberá unha sesión na que se brindarán claves para a educación emocional (luns 7) e outra na que se incidirá na importancia de coidarse para poder educar (28 de abril). Finalmente, en maio programarase unha xornada para analizar o papel das familias en relación coas adiccións de fillos e fillas (5 maio), e haberá sesións específicas para tratar a influencia das redes sociais na sexualidade dos menores (luns 19) e o uso/ abuso das tecnoloxías por parte dos menores (luns 28).

As familias nedenses poden apuntarse naqueles obradoiros que sexan do seu interese, enviando a ficha de inscrición, que pode descargarse na web municipal, ao correo electrónico servizos.sociais@fene.gal. Para obter máis información sobre as charlas deste programa intermunicipal, subvencionado pola Consellería de Sanidade, poden dirixirse ao servizo de educación familiar de Neda (teléfono 981390233, ext. 2). O prazo de inscrición rematará o venres antes de cada sesión e, no caso de que exista demanda, activarase un servizo de conciliación para facilitar a participación.