Comezo das obras de construción da senda peonil que une A Garita con Agraxoiba

• A intervención está subvencionada pola Deputación da Coruña e contempla a realización dunha travesía peonil de 310 m de lonxitude e 1,80 m de ancho.

• O obxectivo desta intervención é a mellora da conservación da infraestrutura viaria do municipio e mellorar as condicións de vida e de traballo no medio rural.

O Concello das Somozas deu comezo as obras de construción da senda peonil que unirá A Garita con Agraxoiba.

Esta intervención, subvencionada pola Deputación da Coruña, conta cun investimento de 77.000 euros no proxecto de construción dunha senda peonil na estrada AC-110, en Agraxoiba.

A finalidade da execución destas obras é a mellora e conservación da infraestrutura da rede viaria do Concello, así como a mellora das condicións de vida e de traballo no medio rural, facilitando a accesibilidade da veciñanza.

Esta obra contempla a realización desta travesía peonil de 310 metros de lonxitude e 1,80 metros de ancho. Ademais, contémplase a canalización con pozos de rexistro de sumidoiro para recollida de augas pluviais, así como a instalación de luminarias e iluminación pública.

Tras a visita as obras, o alcalde, Juan Alonso, subliña “a importancia que teñen todo este tipo de actuacións para seguir mellorando as infraestruturas do municipio e facilitando o día a día da nosa veciñanza”.