O Concello de San Sadurniño promove un curso para a obtención do carné básico de aplicación de fitosanitarios

A actividade ten un prezo de 100 euros para as persoas empadroadas no municipio

O uso de fitosanitarios, xa sexan herbicidas ou outros produtos químicos, require dunha formación específica para garantir a seguridade tanto da persoa que os aplica como do medio ambiente. Unha formación avalada pola Xunta que, tras superar un sinxelo exame, serve para obter o carné de aplicación de fitosanitarios. O carné “de sulfatar” é o documento oficial acreditativo de que se teñen os coñecementos e habilidades necesarios para manipular e aplicar estes produtos de forma segura e responsable. Tras varios anos, e a raíz dunha proposta presentada no pleno municipal, o Concello coordinou a organización dun curso de 25 horas que se impartirá na Casa da Xuventude os días 5, 12, 18 e 19 de abril. As inscricións poden facerse a través do teléfono 684 074 065.

En Galicia, a normativa que regula o uso de produtos fitosanitarios baséase na lexislación estatal e europea, concretamente no Real Decreto 1311/2012, que establece o marco de actuación para conseguir un uso sustentable destes produtos. Para poder manipular e dar fitosanitarios, é obrigatorio obter o carné de persoa aplicadora, que se pode conseguir tras realizar un curso de formación homologado e superar unha proba de avaliación.

O curso básico que se ofrecerá en San Sadurniño no mes de abril -impartido pola academia @Proba- centrarase nos conceptos básicos dos diferentes tipos de produtos fitosanitarios, nos métodos de aplicación máis axeitados, as medidas de seguridade que se deben adoptar e a normativa vixente en materia de fitosanitarios. Ademais, as persoas participantes terán a oportunidade de realizar prácticas para familiarizarse co manexo destes produtos e os equipos de aplicación.

A actividade ten un prezo de 100€ para as persoas empadroadas en San Sadurniño e de 200€ para as persoas doutros concellos. Neste importe inclúense as horas de formación teórica a práctica, o exame (que haberá que aprobar obrigatoriamente para obter o certificado), a tramitación do carné e a inscrición da persoa titular no Rexistro Oficial de Produtores e Operadores (ROPO).

O número de prazas é limitado a 25, e é necesario un mínimo de 10 inscricións para que o curso se leve a cabo. É importante ter en conta que no caso de non superar o exame non será necesario pagar de novo a matrícula (no boletín Novas enviado ás casas indicábase, por erro, que se devolvería o importe).

As sesións desenvolveranse na Casa da Xuventude nas seguintes datas e horarios:

Sábado 5 de abril, de 08:00h a 15:30h
Sábado 12 de abril, de 08:00 a 15:00h
Venres 18 de abril, de 17:00 a 20:00h
Sábado 29 de abril, de 08:00h a 15:30h
Exame o venres 25 de abril (horario por concretar
As persoas interesadas en inscribirse poden chamar ao número de teléfono 684 074 065.