Ribeira recoñece o mérito do Mega Builder Team que vén de clasificarse para xogar o Campionato Nacional First Lego League 

Esta semana o equipo Mega Builder Team de robótica de Ribeira foi recibido polo goberno local no Concello despois de que o pasado 22 de febreiro se clasificara na competición autonómica da “First Lego League” celebrada en Ferrol. Este equipo formado por rapaces de Ribeira, logrou clasificarse no segundo posto por detrás do conxunto ourensán “Captioma Elementals” na undécima edición da fase autonómica do devandito campionato internacional. Este segundo posto permítelle competir na final do Torneo Estatal de Robótica da “First Lego” que este ano se vai a celebrar o 29 de marzo na Universidade da Coruña, a través do Campus Industrial e da Escola Politécnica de Enxeñaría de Ferrol. 

Ao acto acudiron o rexedor, Luís Pérez, o segundo tenente de alcalde, Francisco Suárez-Puerta, a concelleira de Facenda, Herminia Pouso e os integrantes do equipo, Manuel, Ángel, Hugo, Pablo, Soren, Martín, Daniel, Isaac, David e Jorge máis os adestradores Pedro Estévez y Manuel Vilar. 

O adestrador Manuel Vilar explicou en que consiste o campionato; “é un campionato que se celebra tódolos anos en Ferrol, hai unha parte que é o xogo do robot que é un robot que montas con pezas Lego e hai que facer un total de 15 misións que cambian en cada edición, e por outra banda hai que facer un proxecto de innovación relacionado cunha temática na que este ano se tivo que traballar o mundo submarino, as investigacións acuáticas”. Tamén sinalou que para a puntuación tamén se ten en conta os valores do bo facer do traballo en equipo. Esta é a segunda clasificación que conseguen para o estatal, xa que na anterior desprazáronse a Málaga. 

O capitán do equipo, Manuel Vázquez, falou da súa experiencia “eu son os que os axudo nos problemas que teñan, fago un pouco de unión do equipo e saben que me precisan para calquera cousa”.

O rexedor nun ambiente moi distendido interesouse sobre o sistema de clasificación, o adestramento ou as probas ás que se enfrontan; tamén quixo resaltar, “que é un orgullo para toda Ribeira ter rapaces e rapazas menores de idade que son capaces non só de aprender programación, robótica ou informática, senón que tamén comparten valores tan importantes como o compañeirismo, axudándose uns a outros”. Por outra banda puxo en valor “que eses rapaces que no seu día estiveron no equipo de competición, agora que van crecendo pasan a ser adestradores deses compañeiros que veñen atrás; todo un exemplo”. Finalmente desexoulles sorte para o campionato estatal. 

Para rematar o concelleiro de Novas Tecnoloxías e a concelleira de Facenda expresaron o cariño e gratitude a todos estos nenos que están levando o nome de Ribeira alá por onde van e demostran que “en Ribeira tamén temos canteira en campos como a robótica” finalizou Suárez-Puerta.