Últimas semanas para solicitar a organización de  eventos na planta superior do mercado de San  Agustín 

As persoas e empresas interesadas poderán optar ata o 17 de marzo aos  12 lotes de explotación, un por cada mes do ano 

O vindeiro luns 17 de marzo pecharase o prazo de  presentación de ofertas para organizar eventos na planta superior do mercado de San  Agustín. O proceso, aberto desde comezos de febreiro, supón que todas aquelas persoas ou  empresas interesadas poderán optar aos 12 lotes de explotación de dito espazo, un por cada  mes do ano, para a organización de mercadillos, feiras, accións de ocio e todo tipo de eventos.  “Desde o Goberno de Inés Rey seguimos dinamizando os espazos emblemáticos da cidade  con actividades para todos os públicos, dando a oportunidade ás entidades e emprendedores  da cidade de promover eventos tal e como vimos facendo nos últimos anos”, sinala Diana  Cabanas, concelleira de Emprego, Comercio e Mercados. 

A explotación da planta superior de San Agustín permite, ademais, dar a coñecer os produtos  e distintos postos que teñen actividade neste mercado, tanto no interior como no exterior,  onde grazas á acción do Goberno de Inés Rey a meirande parte dos espazos están ocupados  e a pleno funcionamento. “Buscamos contar con eventos de carácter innovador, favorecendo  as actividades comerciais e poñendo en valor o pequeno comercio”, indicou Diana Cabanas. 

A esta oferta de explotación, á que se pode optar mediante concorrencia competitiva, poderán  presentarse proxectos de mercadillos gastronómicos, artísticos, culturais, artesanais,  sostibles, de artículos vintage ou de segundamano, feiras de economía social e outro tipo de  eventos. As persoas ou empresas interesadas poderán optar a 12 lotes, coincidindo con 12  fins de semana, preferentemente un ao mes. As entidades licitadoras poderán concorrer ata  un máximo de seis dos 12 lotes. A duración da autorización da explotación do espazo será  dun ano, puidendo ser prorrogada por dous anos máis. 

Os pregos da licitación poden ser consultados na páxina web municipal. O Concello vén  fomentando todo tipo de eventos nesta planta superior do mercado municipal de San Agustín  nos últimos anos, como por exemplo o Mercado das Nubes, Rebel Wine ou Bocatise, así  como exposicións como a dos proxectos da Bienal de Arquitectura.