O conselleiro de Sanidade supervisa as novas instalacións ampliadas do Laboratorio de Urxencias do Hospital Público da Coruña

― O Executivo galego destinou preto de 500.000 euros a mellorar o servizo que dá resposta á demanda de probas de urxencia do complexo hospitalario, funcionando as 24 horas todos os días

― O novo laboratorio emprázase na planta baixa do hospital e amplía a superficie dos 250 aos 400m2

― O laboratorio de urxencias do Chuac recibe máis de 1.200 peticións de media diaria e emite preto de 4.200 resultados cada xornada

O conselleiro de Sanidade, Antonio Gómez Caamaño, coñeceu o novo Laboratorio do servizos de Urxencias do Complexo Hospitalario Universitario da Coruña. Esta unidade mudou o seu emprazamento no hospital e, tras un investimento de preto de 500.000 euros, ampliou a súa superficie dos 250 até os 400 m2.
Debido á necesidade de ampliar o espazo do laboratorio de microbioloxía, impulsouse o traslado do servizo do laboratorio de urxencias cara a planta baixa do centro hospitalario, adiantando dese xeito un desprazamento que será necesario polas obras do Novo CHUAC. Con estas obras optimízase a capacidade das unidades de análise e de investigación.
Durante a visita, na que o titular de Sanidade estivo acompañado pola delegada territorial da Xunta na Coruña, Belén do Campo; e polo xerente da Área Sanitaria da Coruña e Cee, Luis Verde; Gómez Caamaño puido comprobar o resultado final duns traballos co que o Servizo Galego de Saúde dá resposta ás máis 1.200 peticións diarias que precisan os diferentes servizos asistenciais do complexo hospitalario coruñés. Esta unidade emite máis de 4.200 resultados diarios, os que demanda o labor clínico nos ámbitos da bioquímica, a hematimetría e a coagulación.
No novo espazo, xunto co persoal facultativo de garda, desempeñan o seu labor 25 técnicos de laboratorio.
O Laboratorio de Urxencias conta con áreas de procesado de mostras, microscopia, centrífugas, gasometría, coagulación, ouriños, hematimetrías, preanalíticas e despachos para o persoal médico.