Carballo celebrou o 125º aniversario do pasamento de Alfredo Brañas cun acto protagonizado pola mocidade

Evencio Ferrero lembrou tamén a César Lombera, autor da escultura situada na rúa Coruña, que faleceu hai menos dun mes

Hoxe cumpríronse 125 anos do pasamento de Alfredo Brañas en Compostela, pero o carballés máis ilustre foi lembrado na súa vila natal cun acto protagonizado pola chuvia, no meteorolóxico, e pola mocidade, que foi maioría entre o público. O mal tempo demorou o inicio do acto, desluciu a ofrenda de caraveis vermellos realizada por representantes das tres entidades que participaron na homenaxe _IES Alfredo Brañas, a Asociación Cultural Lumieira e Concello de Carballo_ e obrigou a trasladar ao interior da casa natal de Brañas, “co seu consentimento”, o resto do acto.

Xa a cuberto, na que é unha das tabernas históricas de Carballo, o profesor e historiador Xan Fraga abriu a homenaxe cun percorrido polo Carballo da época de Alfredo Brañas e desvelou algúns aspectos pouco coñecidos da súa figura, como que foi “o gran promotor de que Rosalía inaugurase o que despois se chamou Panteón de Galegos Ilustres”, no que el sería o segundo e recibir sepultura, e ao que, dixo, “nunha ha de irse sen unha rosa ou un caravel para o senlleiro veciño”.

Alfredo Brañas segue a ser hoxe referencia, como apuntou Xan Fraga e como demostran os diversos actos celebrados nos últimos días, e por iso o cronista carballés propuxo institucionalizar esta homenaxe anual a unha figura que destacou no político, no literario e no universitario, e que durante toda a súa curta vida, xa que morreu con 41 anos, tivo Carballo presente.

No acto de hoxe destacouse especialmente a faceta literaria de Brañas coa lectura, por parte do alumnado do IES Alfredo Brañas, de varios textos do autor carballés e mesmo doutros autores coma Castelao sobre el.

“Destes poemarios podemos concluír que Alfredo Brañas foi un precursor _manifestou Evenciio Ferrero_. Agora que tanto se fala de financiamento, se se seguira o exemplo de Alfredo Brañas, Galicia sen dúbida tería moita máis capacidade económica para desenvolver un proxecto no que seríamos donos dos nosos cartos, que é algo fundamental para o desenvolvemento do país”.

Con varias imaxes de Alfredo Brañas de fondo xunto a algún dos bosquexos que inspiraron a escultura situada na rúa Coruña, o alcalde de Carballo quixo ter unhas palabras de lembranza para o seu autor, o artista César Lombera, falecido o mes pasado, e, xa para rematar, instou a mocidade e á sociedade carballesa a non esquecer “a memoria de Brañas”, porque nunca debemos olvidar “quen nos aportou tanto para ser hoxe como somos”.