A Xunta celebra que un científico de prestixio mudial como Ángel Carracedo se achegue á FP galega

— O conselleiro de Educación recibe ao experto en medicina xenética no CIFP Ánxel Casal da Coruña, onde visita os laboratorios do centro e imparte unha charla ao alumnado

— É o centro con máis alumnos de Formación Profesional de Galicia, 2.600, e forma parte da Rede Estatal de Excelencia de FP, o que avala a súa calidade académica

O conselleiro de Educación, Ciencia, Universidades e FP, Román Rodríguez, gabou hoxe no Centro Integrado de FP Ánxel Casal-Monte Alto, na Coruña, a traxectoria profesional e persoal de Ángel Carracedo como un científico de prestixio mundial e agradeceulle que se achegue á FP galega para compartir toda a súa experiencia e coñecementos co alumnado da Formación Profesional da rama sanitaria.
O titular de Educación da Xunta visitou os laboratorios do centro xunto ao coñecido investigador, un referente na medicina xenética, e asistiu á charla que Ángel Carracedo impartiu ante os estudantes, aos que animou a “aproveitar a máximo e aprender da visita dun dos nomes máis destacados da ciencia feita en Galicia para o mundo”.
O catedrático de Medicina Legal da Universidade de Santiago de Compostela puido coñecer este centro, que é un referente nas ensinanzas da familia profesional de Sanidade con ciclos específicos como Laboratorio clínico e biomédico, Anatomía patolóxica, Medicina nuclear ou Radioterapia, entre outros.
Impresión de gominolas farmacéuticas e esterilización 360
Antes do relatorio, o conselleiro acompañou a Carracedo nunha visita ás instalacións guiada polo equipo directivo, onde se interesou polos laboratorios e os equipamentos de última xeración cos que conta. No laboratorio de Farmacia e Parafarmacia asistiron a unha demostración do proxecto de innovación FarmaGummies, de impresión de gominolas farmacéuticas, e no de Simulación e espazo de edición fixeron un percorrido virtual da central de esterilización en 360º do Complexo Hospitalario Universitario da Coruña.

O CIFP Ánxel Casal, con preto de 2.600 matrículas, concentra o maior número de estudantes de FP de Galicia, e o seu nivel académico fixo que en 2022 entrara a formar parte da Rede Estatal de Excelencia de Formación Profesional, na que Galicia está no grupo de comunidades líderes cun total de cinco centros.