As alumnas do curso de atención sociosanitaria coñecen as entidades da zona que traballan con persoas dependentes

En maio comezará unha nova acción formativa de xestión de chamadas de teleasistencia. Infórmate no Fórum Carballo!

As alumnas do curso de atención sociosanitaria a persoas dependentes en institucións sociais tiveron a oportunidade nestes últimos días de coñecer máis de preto o labor de APEM e Íntegro, dúas das entidades que prestan servizo a persoas dependentes na nosa contorna.

Por unha banda recibiron a visita da psicóloga da Asociación Pro Enfermos Mentais (APEM), Isabel Varela, que se achegou ata o Fórum Carballo para explicar a relevancia da atención e do acompañamento ás persoas con trastornos mentais, así coma os retos que afronta no seu día a día.

Por outra, as alumnas desprazáronse ata o concello de Cabana para coñecer as instalacións de Íntegro, que atende a persoas con diversidade funcional de toda a Costa da Morte. Foi unha experiencia enriquecedora, promovida pola directora de Íntegro, Noelia Barreira, despois da visita que realizara ao Fórum a semana anterior
para dar a coñecer o labor que desenvolve Íntegro.

Actividades deste tipo permiten reflexionar sobre a importancia de promover a inclusión, de combater os estigmas e de garantir unha atención baseada no respecto e a dignidade, e axudan a formar profesionais máis comprometidas e preparadas para ofrecer un apoio integrado e humanizado.

O curso de atención sociosanitaria a persoas dependentes en institucións sociais comezou o 12 de decembro do 2024 e prolongarase ata o 25 de abril deste ano, cunha duración total de 468 horas que inclúen 80 de prácticas.

Pero desde as concellarías de Formación e Emprego, por unha banda, e Servizos Sociais, Igualdade e Sanidade, pola outra, seguimos apostando pola formación no ámbito sociosanitario. Deste xeito, para o mes de maio está previsto o inicio dun curso de Xestión de chamadas de teleasistencia (nivel II). Se non queres perder a oportunidade de formarte neste ámbito achégate ás oficinas municipais do Fórum Carballo ou chama ao 981 709 010.