O Kiosco Alfonso acolle ata o 27 de abril a mostra ‘A cidade das artes’, que conmemora o 175º aniversario da Real Academia Galega de Belas Artes

O concelleiro José Manuel Lage tomou parte hoxe na apertura da exposición, integrada por máis de 150 pezas entre materiais artísticos, históricos e documentos, que amosan a traxectoria da RAGBA ao longo do tempo

O concelleiro de Economía e Planificación Estratéxica, e voceiro do Goberno municipal, José Manuel Lage, participou esta tarde no acto de apertura da exposición ‘A cidade das artes’, unha iniciativa na que o Concello colabora coa Real Academia Galega de Belas Artes nos actos conmemorativos polo seu 175 aniversario.

O evento tivo lugar na sala de exposicións municipal do Kiosco Alfonso, onde xa está aberta á cidadanía unha mostra integrada por máis de 150 pezas, entre materiais artísticos, históricos e documentos, obras de membros da Real Academia e estudosos das artes do país que contribúen, desta forma, a amosar a traxectoria da RAGBA ao longo do tempo. Ademais, a exposición tamén presta especial atención á visibilidade das obras e o traballo das académicas.

Na súa intervención, Lage destacou que “as belas artes, e por suposto a súa Real Academia, son tamén unha porta de entrada a altos valores, unha escola de cidadanía, e no noso caso de coruñesismo, ese xeito especial de galeguismo”. Lage subliñou, ademais, que “A Coruña é cidade líder en pintura e gravado, de escultura, arquitectura, música, arqueoloxía e museoloxía e artes da imaxe. Todas estas disciplinas están representadas hoxe na Real Academia Galega de Belas Artes”, á que o voceiro do Goberno municipal felicitou pola súa mostra e aniversario, “un magnífico xeito de lembrar a súa importancia no eterno carácter ilustrado da nosa cidade”.

No acto desta tarde tamén participaron o concelleiro de Cultura e Turismo, Gonzalo Castro, Manuel Quintana, presidente da Real Academia Galega de Belas Artes, Anxo Lorenzo, director xeral de Cultura da Xunta de Galicia, e Fernando Agrasar, comisario da exposición.

A mostra estará aberta no Kiosco Alfonso ata o día 27 de abril. Ata entón, programaranse seis conferencias abertas ao público, de diferentes especialistas, que se celebrarán no espazo baixo cuberta do Kiosco.