Laxe prepárase para vivir un Entroido cheo de cor, música e moita troula

LAXENTROIDO 2025 celebrarase do 1 ao 9 de marzo  cunha ampla programación que inclúe desfiles,  música, concursos e a tradicional queima de Don  Caetano. 

Laxe xa quenta motores para celebrar o  LAXENTROIDO 2025, unha das festas máis esperadas do ano, cunha  programación chea de actividades para todas as idades. Durante nove días, as  rúas do municipio encheranse de cor, diversión e tradicións, cun programa que  inclúe desfiles, concursos, festa con inchables, filloas e chocolate de balde, e a  despedida de Don Caetano cun velorio cómico e a súa queima pirotécnica  silenciosa. 

O sábado 1 de marzo, a festa comezará cun gran Desfile de Entroido e de  Comparsas, ás 17:30 horas, inaugurado por Don Caetano e amenizado pola  Charanga Santa Compaña e Pulpíño Viascón. A partir das 18:30, o  Pavillón Polideportivo converterase no epicentro da festa, con inchables,  baile, photocall, música en directo e degustación gratuíta de filloas e  chocolate. Ademais, celebrarase o IV Certame Participativo de  Entroidos, no que se repartirán premios de ata 250€ para as mellores  comparsas.

O venres 7 de marzo, terá lugar o Velorio de Don Caetano, unha das  tradicións máis emblemáticas do Entroido laxeiro, que se celebrará ás 12:00  horas diante do Concello. 

O broche final chegará o domingo 9 de marzo cunha despedida moi especial.  Ás 18:00 horas, a Praza dos Voluntarios acollerá o velorio e a misa cómica  a Don Caetano, seguido dun desfile festivo animado pola Batucada-Escola  de Samba Malandros, que percorrerá as rúas ata a zona de Ramón Juega.  Como colofón, a tradicional queima pirotécnica silenciosa de Don  Caetano porá punto final a unha semana chea de ledicia e diversión. 

O Concello de Laxe, organizador do evento, convida a toda a veciñanza e  visitantes a participar no LAXENTROIDO 2025 e a vivir unhas xornadas  cheas de festa, cultura e tradición.