O Concello abre o mércores o prazo de solicitude  para optar ás axudas do plan de apoio ás entidades  musicais da cidade, dotado con 250.000 euros 

A través desta iniciativa, o Goberno de Inés Rey busca reforzar o seu  apoio ás asociacións e entidades que representan a cultura tradicional e  popular  

O Concello da Coruña abre este mércores, 19 de febreiro,  a convocatoria do Plan de apoio ás entidades musicais locais de cara a este ano 2025. As  bases poderán ser consultadas a partir de mañá na páxina web municipal e a contía destinada  ás entidades pasa de 200.000 a 250.000 euros nesta edición. 

“Por medio desta iniciativa, o Goberno de Inés Rey busca reforzar o seu apoio ás asociacións  que representan a cultura tradicional e popular”, indicou o concelleiro de Cultura e Turismo,  Gonzalo Castro. O plan busca contribuír á difusión da oferta musical das entidades sen ánimo  de lucro que desenvolven a súa actividade cultural na cidade, cun grao de implementación  social representativo e cunha formulación musical e de baile. 

“As asociacións que visibilizan a cultura tradicional da Coruña e os seus barrios son  fundamentais á hora de trazar a nosa identidade. Por iso, o noso obxectivo é poñelas en valor  e fomentar a súa presenza na programación anual de eventos culturais na cidade, cunha  perspectiva de continuidade”, expuxo a alcaldesa, Inés Rey. Neste sentido, a rexedora puxo  como exemplo a Romaría de Santa Margarida, que se organiza cada ano durante o mes de  agosto, ao abeiro das Festas de María Pita. 

A este respecto, a dotación prevista polo Concello de cara á convocatoria de axudas deste  ano é de 250.000 euros, acadando a súa maior contía nesta convocatoria. O prazo para  presentar as solicitudes abrirase este mércores e haberá un total de quince días naturais para  que as asociacións e entidades interesadas presenten a súa documentación.

As solicitudes poderán presentarse, preferentemente, por vía telemática. Será a través da  sede electrónica, dirixindo a solicitude ao Instituto Municipal Coruña Espectáculos (IMCE).  Admitiranse tamén solicitudes presenciais no Rexistro administrativo do IMCE (avenida da  Marina, 18), previa cita no teléfono 981 184 233 ou a través desta ligazón.