O Concello remata as obras de mellora enerxética do edificio de actividades extraescolares do CEIP Emilia Pardo Bazán, nos Rosales

Os traballos consistiron na substitución de todas as ventás do inmoble para mellorar o illamento térmico

O Concello finalizou esta semana os traballos de substitución de todas as ventás do edificio de actividades extraescolares do CEIP Emilia Pardo Bazán, colexio situado no barrio dos Rosales. O concelleiro de Educación, Formación e Innovación Tecnolóxica, Juan Ignacio Borrego, visitou o centro para supervisar o resultado dos traballos. “Esta e outras melloras que estamos levando a cabo nas escolas infantís e colexios da cidade forman parte das políticas impulsadas pola nosa alcaldesa, Inés Rey, para dotar á Coruña de espazos educativos de calidade”, indicou o edil.

O complexo do CEIP Emilia Pardo Bazán componse de tres edificios. Nun extremo da parcela sitúase o empregado para Educación Primaria e a súa correspondente ampliación, que comezou a súa actividade no 2015. No outro lado da parcela está a antiga sede de Educación Infantil, edificio que agora está destinado ás actividades extraescolares. “Atendendo ás demandas dos pais e nais do alumnado, desde o Goberno de Inés Rey puxemos en marcha esta actuación co obxectivo de garantir a seguridade das persoas usuarias, así como mellorar o benestar interior e eliminando posibles filtracións de aguas”, indicou Juan Ignacio Borrego.

Os traballos consistiron na substitucións das ventás, as súas carpinterías exteriores e outros elementos deteriorados por outros de última xeración. Actuouse no conxunto do edificio, que consta de dúas plantas. O orzamento da actuación ascendeu a máis de 140.000 euros.

Ademais, o concelleiro tamén puido comprobar na súa visita ao centro as melloras realizadas polo Concello no peche perimetral do recinto. “Con esta actuación tamén quixemos mellorar a seguridade dos nenos e nenas usuarias deste colexio, tal e como estamos a facer na EIM dos Rosales”, indicou Juan Ignacio Borrego.