O teatro para nenos e nenas volve ao Ágora co ciclo  Bebescena de primavera 

Representaranse un total de cinco obras entre os meses de febreiro e  xuño 

O Concello inicia este mes de febreiro o ciclo Bebescena  de primavera, con cinco espectáculos de teatro para bebés ata o mes de xuño que se  celebrarán no auditorio do Centro Sociocultural Ágora. As entradas para todas as funcións  xa están á venda a un prezo de 6 euros. Tamén hai dispoñible un abono familiar de tres  entradas para a mesma función a un prezo de 15 euros. Os menores de tres anos aboarán  2 euros por entrada. A compra de billetes pode realizarse a través de Ataquilla e dos  despachos de billetes da praza de Ourense e do Ágora desde as 11.00 horas do venres  anterior á celebración de cada espectáculo. 

“Desde o Concello temos claro que o acceso á cultura debe ser universal, por iso  continuaremos un ano máis dinamizando un dos nosos espazos máis importantes con  actividades para os máis pequenos”, sinalou Gonzalo Castro, concelleiro de Cultura e  Turismo. As propostas que o Goberno de Inés Rey ofrece neste ciclo este ano son moi  variadas: con ou sen palabras, con obxectos, con música, con movemento, con efectos  audiovisuais… Todas pretenden espertar sensibilidades e transmitir emocións achegando  aos mais pequenos ao teatro, á danza e á música. 

As obras para espectadoras/es tan precoces reúnen algúns requisitos. Un deles é a  proximidade entre a escena e o público, o que leva a que o patio de butacas se transforme  nunha zona pegada ao escenario, con alfombras, coxíns ou pequenos bancos, onde nenas  e nenos poden permanecer sentados con menos rigor e dun xeito máis acorde á súa  anatomía, á beira dos seus pais. O segundo requisito é a duración, que flutúa entre 30 e 45  minutos, que é o tempo que a atención dun bebé se pode fixar na actividade.

Programación 

‘Cliska’, de PanicMap 

Domingo 13 de febreiro – 11.30 e 13.00 horas 

Sinopse: Closka é un poema escénico sobre a riqueza do pequeno lugar neste  recuncho do universo no que vivimos. Celebramos a sorte que temos, reflexionando  tamén sobre a responsabilidade que temos. A través dos ollos e do oído de Closka,  unha vella tartaruga xigante, e as súas preguntas, realizaremos unha viaxe  emocional por algúns dos lugares máis curiosos do planeta. 

‘A guarida dos sentidos’, de elPetit & Imaginart 

Domingo 23 de febreiro – 11.30 e 13.00 horas 

Sinopse: Unha instalación para descubrir, imaxinar e soñar. Unha pequena aldea  formada por nenos de roupa e tecidos, semellante ás construcións feitas polos  paxaros, con materiais de diferentes texturas e ollos, cheos de sorpresas que nos  amosarán dous seres que habitan alí. Un lugar onde esconderse e observar o  mundo desde dentro. Camiños que nos levarán á casa dos outros, onde atoparemos  diferentes cores, músicas e ruídos estraños. Almofadas que falan, roncando, rindo e  cantando. Un espazo para compartir coa familia, para relaxarnos e gozar xuntos da  confortabilidade do propio neno. 

‘Os comenoites’, de Os Náufragos Teatro 

Domingo 9 de marzo – 11.30 e 13.00 horas 

Sinopse: Comenoites baséase no conto infantil escrito e ilustrado por Ana Juan  (Premio Nacional de Ilustración). Unha fermosa historia coa que os nenos e nenas  descubrirán os misterios da existencia do día e da noite. Comenoites é un trasgo  barrigudo ao que lle encanta comer a noite para que o Sol poida raiar día tras día,  traendo luz, calor e cor para todos. Pero un día a Lúa dille que está moi gordo e 

Comenoites decide deixar de comer. Cal é o problema? Que se Comenoites non  come a noite, o frío e a escuridade reinarán para sempre na Terra e o Sol non  volverá a raiar nunca. Volverá comer Comenoites algún día? Volverá raiar, daquela  o Sol? 

‘MANS’, de Os contos de Pablísimo 

Domingo 4 de abril – 11.30 e 13.00 horas 

Sinopse: MANS é un espectáculo de teatro e narración oral onde as historias se  contan con palabras e os personaxes aparecen nas mans. Contos populares, contos  de creación propia, fábulas e xogos feitos coas mans e dramatizados con sombras  chinesas, monicreques, luvas e moita imaxinación! Os contos de Pablísimo é unha  compañía especializada en contacontos, teatro de animación á lectura e teatro  infantil. Os seus espectáculos de pequeno e mediano formato toman sempre como  base a literatura infantil (contos clásicos, contemporáneos e de creación propia), a  tradición oral e o teatro. Fundada no ano 2001, leva producidos máis de 20  espectáculos nos que mestura monicreques, música en vivo, teatro de sombras e  narración oral. 

‘Blink Flash Duncan, de Blink Flash 

Domingo 15 de xuño – 11.30 e 13.00 horas 

Sinopse: Unha boa tarde, mentres todo o mundo durme, unha nena desencantada,  un pouco triste e aburrida, chega a unha praia. De repente, o seu mundo baleiro  comeza a encherse de maxia: Isa descóbrese creadora. Cada recuncho da praia  gardará un obxecto que inicia un novo mundo con unha cor, música e experiencia  propios. Isa é unha rapaza valente e atrévese a xogar. O mundo cambiou, é un lugar  cheo de posibilidades. Contaremos un último segredo: estes obxectos gardan  experiencias vitais de Isadora Duncan. Os nenos non a verán, nós tampouco, pero  ela agasallaranos un camiño cara á liberdade, cara ao descubrimento do propio  movemento, cara á creatividade, cara á ilusión.