A Xunta premiará a excelencia dos Centros Comerciais Abertos no marco das axudas de 2,5M€ para fortalecer a súa capacidade dinamizadora en vilas e cidades

― O Diario Oficial de Galicia vén de publicar a nova orde da Consellería de Emprego, Comercio e Emigración para apoiar as actividades das agrupacións de comerciantes, buscando primar a calidade e a innovación das súas propostas

― A convocatoria prevé axudas extraordinarias de 50.000€ para recoñecer o labor dos mellores CCA, co obxectivo de apoiar de campañas adicionais que teñan como obxectivo promover o comercio local e chegar a novos clientes

― Este ano tamén se avanzará na creación do rexistro e reconfiguración dos centros comerciais abertos, con nova denominación e imaxe propia, concibida desde unha dinamización integral das contornas comerciais

― Estas medidas enmárcanse no Plan estratéxico do comercio 2025-2030, baixo o que se engloban outros apoios como os dirixidos a impulsar a modernización, dixitalización e sostibilidade do comercio retallista (3,9M€) e que se publicará o venres 14

O Diario Oficial de Galicia (DOG) vén de publicar a orde da Consellería de Emprego, Comercio e Emigración dotada dun importe de 2,5 millóns de euros para impulsar as actividades dos centros comerciais abertos da Comunidade, reforzando a súa excelencia e a súa capacidade de dinamización das contornas nas que se integran. Enmarcada no compromiso coa revitalización do comercio local como elemento esencial para o desenvolvemento económico e social das vilas e cidades galegas, a Xunta lanza esta convocatoria de achegas incrementando o seu orzamento global e incorporando novidades para potenciar ao máximo estas figuras clave.

Así, a nova orde aposta polo réxime de concorrencia competitiva buscando primar a calidade e a excelencia das propostas de dinamización. Ademais, as asociacións poderán optar a axudas extraordinarias de 50.000 euros para a realización de actividades en coordinación con concellos e outras entidades locais.

Detalles da convocatoria
Poderán concorrer a estas axudas as asociacións de comerciantes de carácter territorial e sen ánimo de lucro que, legalmente constituídas, que desenvolvan proxectos de interese para revitalizar a actividade comercial nas súas localidades. Tanto no caso das sete grandes cidades como do resto dos concellos, estes centros deben contar cunha antigüidade mínima de tres anos, unha xestión profesionalizada, delimitación territorial definida, diversidade de oferta comercial e, como mínimo, representar 50 negocios retallistas.

As axudas apoian a realización de actividades de dinamización comercial que teñan como obxectivo a incentivación do consumo e a atracción de clientes, co fin de incrementar as vendas. Para optar ás achegas, as agrupacións deberán presentar a planificación e desenvolvemento dun mínimo de seis campañas que conten coa participación directa dos comercios asociados e dos consumidores, así como a planificación de dúas accións formativas. Opcionalmente, tamén poden propoñen outras actuacións complementarias de fidelización e servizos para a clientela.

Os investimentos máximos subvencionables modúlanse en tres tramos, en función do número de comercios asociados: 65.000 euros no caso de que teñan 100 ou máis; 55.000 euros para os que teñan entre 70 e 99; e 40.000 euros para aqueles que se sitúen entre os 50 e os 69 negocios adheridos. Pola súa parte, a intensidade das axudas poderá oscilar entre o 70 e 90 %, segundo a puntuación acadada polas propostas presentadas, en cuxa valoración se terán en conta criterios como a disposición dun plan de comunicación, a capacidade da campaña para motivar á persoa consumidora ou captar clientela nova ou o seu carácter novidoso. Deste xeito, as achegas máximas da convocatoria poderán alcanzar os 58.500 euros.

De xeito extraordinario, do total do orzamento da convocatoria, resérvanse 250.000 euros para premiar as cinco mellores propostas, poderán acceder a un apoio adicional para a realización de actividades de dinamización comercial extraordinarias que deben de ser levadas a cabo en coordinación cos concellos e outras asociacións. En canto ao prazo de solicitude destas axudas, arranca o 19 de febreiro e prolongarase ata o 19 de marzo. O prazo de resolución será de cinco meses a partir do día seguinte ao remate do prazo de presentación de solicitudes.

Plan Estratéxico de Comercio
Esta orde enmárcase no Plan estratéxico do comercio 2025-2030, que estará rematado no primeiro trimestre deste ano tras o proceso participativo desenvolvido nos últimos meses. No seu marco, tamén se avanzará na creación do rexistro e reconfiguración dos centros comerciais abertos, con nova denominación e imaxe propia, concibida desde unha dinamización integral das contornas comerciais. Ademais, o vindeiro venres 14 está prevista a publicación no DOG dos apoios para impulsar a modernización, dixitalización e sostibilidade do comercio retallista e dos obradoiros artesanais galegos, cun orzamento de 3,9 millóns de euros.
Ligazón á orde no DOG: https://www.xunta.gal/dog/Publicados/2025/20250207/AnuncioG0767-290125-0001_gl.html