Inés Rey recibe ás relatoras e organizadoras do congreso ‘Inspiring Women Leaders in the Digital Era’

A alcaldesa, Inés Rey, deu esta tarde a benvida no Palacio Municipal de María Pita a convidadas, relatoras e persoas membro da Comisión Organizadora do Congreso ‘Inspiring Women Leaders’. Durante a súa intervención, destacou a tradición feminista da cidade e a súa vinculación histórica co liderado feminino. “É un pracer recibiros na nosa cidade con motivo do Congreso ‘Inspiring Women Leaders’, unha urbe que ten nome feminino, tradición feminista e unha historia internacional vinculada, tamén, ao liderado das mulleres”, expresou Rey ao inicio do seu discurso.

Inés Rey subliñou a importancia deste tipo de encontros para seguir avanzando na igualdade e fomentar o liderado feminino e convidou ás asistentes a gozar da Coruña e da súa riqueza cultural e patrimonial: “Non abonda con recoñecer os logros do pasado, debemos seguir construíndo un futuro no que a equidade e a diversidade sexan piares fundamentais”.

O Congreso ‘Inspiring Women Leaders’ reúne a destacadas profesionais de distintos ámbitos co obxectivo de xerar redes de apoio, compartir experiencias e seguir abrindo camiños cara á igualdade.