O Concello de Laxe, a través da Concellería de Comercio, Hostalaría, Turismo e Cultura, convoca a VI edición do Certame de Dedicatorias de Amor “Dillo ben bonito”, unha iniciativa que ten como obxectivo fomentar a creación literaria e promover o turismo no municipio.
Baixo a temática do amor en parella, real ou platónico, esta nova edición volve apostar por textos breves en prosa ou en verso que destaquen pola súa orixinalidade, sentimento e calidade literaria. O certame está aberto a todas as persoas maiores de idade, sen necesidade de que sexan residentes en Laxe.
Prazo e participación
As persoas interesadas poderán presentar a súa dedicatoria ata as 11:00 horas do 10 de febreiro de 2025, mediante tres modalidades:
- A través da sede electrónica do Concello de Laxe.
- Por correo postal dirixido ao Departamento de Cultura.
- De forma presencial no Rexistro Xeral da Casa do Concello.
Os textos deberán presentarse asinados baixo pseudónimo para garantir a imparcialidade do proceso de votación, e deberán ter unha extensión mínima de 30 palabras e máxima de 300. As composicións poden estar escritas en galego ou en castelán, sendo o galego a lingua preferente do certame.
Proceso de votación e premios
A elección das dedicatorias gañadoras realizarase mediante votación popular a través da páxina de Facebook do Concello de Laxe e do servizo municipal de mensaxería WhatsApp “NovasLaxe”. O proceso de votación desenvolverase entre os días 12 e 16 de febreiro.
As nove dedicatorias máis votadas recibirán como premio unha noite de aloxamento con almorzo para dúas persoas en establecementos turísticos de Laxe. A asignación do aloxamento realizarase segundo a orde de clasificación no certame.
O resultado final darase a coñecer o día 21 de febreiro de 2025, momento no que tamén se desvelará a identidade das persoas autoras das dedicatorias gañadoras.
Promoción da creatividade e do turismo local
O Certame de Dedicatorias de Amor “Dillo ben bonito” busca, ademais de impulsar a creatividade literaria, promover o coñecemento e a visibilidade dos establecementos turísticos do municipio. A iniciativa permite, así, dinamizar a oferta hostaleira local e dar a coñecer Laxe como destino turístico durante todo o ano.
Toda a información sobre as bases e o proceso de participación está dispoñible na sede electrónica do Concello de Laxe (https://sede.laxe.es).
Para máis información, as persoas interesadas poden contactar co Departamento de Cultura do Concello de Laxe a través do correo electrónico cultura@concellodelaxe.com.
