Edificio para entidades sociais, auditorio, zona verde no Rego da Balsa, reforma da Praza do Concello e contorna e redes wifi son as principais actuacións previstas
O Ministerio de Facenda publicou no BOE do 30 de decembro de 2024 a convocatoria de axudas do Fondo Europeo de Desenvolvemento Rexional (Feder) destinadas a entidades locais para o período 2021-2027 co obxectivo de promover o seu desenvolvemento sustentable desde unha tripla perspectiva: ambiental, económica e social. Carballo optará a estas axudas con cinco proxectos integrados que inclúen 17 actuacións.
Este mércores celebráronse no Fórum Carballo tres xuntanzas sectoriais para dar a coñecer as propostas. Na primeira participaron os grupos da corporación; na segunda, as entidades sociais, e na terceira, o movemento asociativo en xeral. Técnicos municipais e da consultora encargada da elaboración dos proxectos, xunto co concelleiro de Fondos Europeos e Axenda Urbana, Iván Andrade, e o alcalde, Evencio Ferrero, presentaron as actuacións e explicaron que súa na elección influíron diferentes factores que se corresponden cos criterios establecidos na propia convocatoria, é dicir, que os proxectos sexan transformadores, integrados e integradores; que sexan realistas e maduros, é dicir, que sexa posible materializalos no prazo previsto (decembro do 2029) e que sexan participados e divulgados, como se está a facer.
Partindo dos criterios establecidos na convocatoria, o Concello de Carballo abordará unha serie de actuacións que perseguen os seguintes obxectivos:
1. Dinamización social, mediante a creación dun novo edificio para as entidades sociais e a mellora da contorna para a súa vinculación dos espazos e servizos próximos. En concreto, a proposta recolle a iniciativa municipal de construción dun edificio no solar das antigas casas dos mestres, así coma unha praza, e a reurbanización da rúa Darwin para favorecer os desprazamentos peonís das persoas usuarias.
O deseño do edificio realizarase mediante un concurso de ideas, en colaboración co Colexio Oficial de Arquitectura de Galicia (COAG), e coa participación directa das entidades sociais implicadas.
2. Consolidación como motor cultural, grazas á creación dun novo auditorio e espazo cultural que permita dar resposta ás crecentes necesidades derivadas do posicionamento de Carballo como referente cultural.
O proxecto complementarase coa incorporación de pantallas informativas nas rúas para a difusión dos servizos culturais do concello.
3. Renaturalización da zona urbana e creación e eixes verdes na contorna do Rego da Balsa. A proposta inclúe a creación dunha nova zona verde, a renaturalización do espacio de aparcamento do Centro Comercial Bergantiños, a conexión dese novo espazo co Rego da Balsa e a creación dun carril bici, e a reurbanización das rúas Ánxel Fole e Enrique Sánchez para conectar as zonas verdes co centro.
4. Desenvolvemento económico e comercial, coa posta en valor da feira e do mercado municipal como motores económicos do noso concello. Con esa finalidade prevese a reurbanización da Praza do Concello e a dignificación do espazo destinado ás feiras, a reforma da primeira planta do mercado municipal para a dinamización do edificio, a creación dun catálogo dixital dos postos da feira e do mercado para facilitar a difusión dos servizos que ofrecen e a reurbanización das rúas Cervantes, Gran Vía, Túnel e Cesteiros para completar a humanización na contorna da praza.
5. Mellora dos servizos e das infraestruturas públicas mediante a rehabilitación enerxética da casa do concello, o despregue de redes wifi gratuítas nos centros sociais e a creación dun servizo de xestión dixital dos espazos municipais que permita a súa reserva online por parte da veciñanza.
Os concellos de 20.000 a 75.000 habitantes, como é o caso de Carballo poden presentar proxectos por un mínimo de cinco millóns e un máximo de quince millóns de euros. O noso concello solicitará a cantidade máxima. Carballo pode optar a estas axudas, coas que poderá financiar ata o 60% do investimento total, por ter elaborada xa a Axenda Urbana, que recolle o noso compromiso cun concello máis sostible, inclusivo e resiliente, aliñándonos cos obxectivos da Axenda Urbana Española e Europea.
