Poderá visitarse do 31 de xaneiro ao 28 de febreiro na sala do andar -1 do Pazo da Cultura
Cultura con Forza presenta unha nova exposición no Pazo da Cultura: “O son do nordés”. Trátase dunha retrospectiva de Loli España, unha artista plástica moi vinculada a Carballo que nesta mostra presenta algunhas das obras que foi creando dende que se licenciou en Belas Artes. Poderán aprezarse as diferentes etapas do seu proceso creativo desde o ano 2000 a través de 25 anos de andaina que agora nos ofrece en forma de paisaxes, pezas abstractas ou mesmo retratos. Obras cheas de fantasía recreadas con materiais de experimentación e fundidas coas cores tradicionais nunha procura permanente.
Loli España viviu entre A Coruña, Ourense e Pontevedra ata que no ano 2002, cando se mudou a vivir ao lugar onde naceron os seus antergos, moi preto de Carballo, un espazo máxico para ela, no que de cando en cando peta o nordés. Quen se acheguen ao Pazo da Cultura poderán desfrutar dunha selección de preto de 20 obras que inclúen técnicas moi variadas, que van desde óleo a pintura acrílica ou con soportes tan diversos como metacrilato, espello ou mesmo táboa.
Loli España asegura que “pinta polo pracer de pintar”, tendo sempre presente o obxectivo de crear un proxecto de “ledicia, respecto, educación e felicidade”. A artista ten levado as súas obras a lugares como o Museo MIHL de Lugo ou a Casa de Galicia en Madrid, entre outros.
A inauguración da exposición terá lugar o venres 31 de xaneiro ás 20.00 horas no andar -1 do Pazo da Cultura e estará amenizada por Susana de Lorenzo, contando coas filmacións de Jesús ArtÉxtasis. A mostra poderá verse do venres 31 de xaneiro ao venres 28 de febreiro en horario de luns a sábado de 17.00 a 21.00 horas.
Deja un comentario
Lo siento, debes estar conectado para publicar un comentario.