Bergondo leva a pleno a aprobación do POS+ 2025, con máis de 900.000 euros en investimentos

· O Concello destinará esta subvención a regas asfálticos en diferentes parroquias, á rehabilitación do edificio de Servizos Sociais e á renovación de beirarrúas, rede de saneamento e abastecemento na Lagoa, Ouces.

O Concello de Bergondo levará a pleno mañá, mércores 29 de xaneiro, a aprobación da súa participación no Plan Provincial de Cooperación ás Obras e Servizos de Competencia Municipal (POS+ 2025), promovido pola Deputación provincial da Coruña e que supón un paquete de investimento de máis de 900.000 euros no municipio.

A proposta que se presentará ao pleno inclúe proxectos estratéxicos para Bergondo, como a execución de regas asfálticos nas parroquias de Lubre, San Salvador de Bergondo, Vixoi e Rois, cun orzamento de 202.095,99 euros, e a rehabilitación enerxética e outras actuacións no edificio municipal de Servizos Sociais, cun investimento de 225.348,58 euros. Tamén se someterá a aprobación a renovación de beirarrúas, redes de saneamento, abastecemento e outros servizos na AC-162, en Lagoa (Ouces), cun orzamento de 500.373,22 euros.

No caso das regas asfálticos, cabe destacar que o plan de actuación abarca 7,84 quilómetros de vías, dos cales 5,41 están na parroquia de Lubre, que será a máis beneficiada por esta iniciativa.

Desde o goberno local destácase a importancia deste pleno, subliñando que estes proxectos son esenciais para continuar mellorando as infraestruturas e servizos públicos do municipio. Tamén agradecen o apoio da Deputación da Coruña por habilitar este mecanismo que permiten aos concellos avanzar no seu desenvolvemento local.

Ademais, no pleno tamén se debaterán outras cuestións como a aprobación do POS+Adicional para financiamento de gastos correntes e para gastos sociais extraordinarios, a quinta fase do plan de saneamento municipal ou o período medio de pago a provedores, entre outros asuntos.