As subvencións da Xunta para a adquisición de vivendas protexidas non se conceden ata o final da obra e exclúen as cooperativas concertadas

A Xunta de Galicia publicou oficialmente as distintas subvencións para a adquisición de vivenda protexida, que exclúen as cooperativas, e que ademais non se conceden ata a sinatura das escrituras, é dicir, ata o final da obra. O Concello de Oleiros reclama que os cartos se entreguen no momento de afrontar o pago inicial da entrada das vivendas, que é cando realmente máis se necesita, e que se inclúan todas as vivendas protexidas, tamén cooperativas como as de Oleiros que son protexidas en réxime concertado.

Pouco sentido ten esta política de vivenda da Xunta de Galicia, a non ser que o que realmente se pretenda sexa realizar un anuncio propagandístico e que os fondos non se repartan. O principal escollo das persoas que queren adquirir unha vivenda protexida está na falta de recursos para afrontar o pagamento da entrada, dado que os bancos non financian máis do 80% do custo dos pisos. Son moitas as persoas que non dispoñen dese 20% restante, que hai que pagar inicialmente, e que quedan totalmente desamparadas ante as políticas da Xunta, a administración con competencias en vivenda xunto co Estado.

“A Xunta debe modificar as súas subvencións á adquisición de vivenda se realmente quere que os cidadáns poidan comprar pisos. Fan falta axudas reais e non publicidade de cara á galería. Son moitas as persoas que non poden participar en iniciativas como a que fixemos nós de promover cooperativas de vivenda dado que non dispoñen dos cartos para o pago inicial do 20% da vivenda”, comentou o alcalde Ángel García Seoane.