O goberno ribeirense apoia a veciñanza de Aguiño e solicita que Sanidade cubra todas as vacantes de médicos do concello

Hoxe, diante do Concello de Ribeira produciuse unha concentración masiva na que se fixo entrega de máis de 2600 sinaturas para reclamar a presenza de médicos a tempo completo no centro médico de Aguiño. A mobilización, organizada pola veciñanza, reflicte a indignación e preocupación crecente pola falta de recursos sanitarios que afecta a este núcleo poboacional.
O concelleiro delegado de Sanidade, Juan Luis Furones sinalou: “o problema é que se prioriza os medios técnicos sobre os medios humanos e os medios humanos son tan importantes ou máis que os técnicos, ao final a medicina no fondo é unha labor diagnóstica que os ordenadores non son capaces de facer porque é unha labor de probabilidade inversa que se aprende co trato e coa convivencia do paciente. A proximidade é un dos factores que máis influenza ten na recuperación dos pacientes e no diagnóstico correcto e o tratamento correcto dos mesmos; isto non se está a priorizar, se está a priorizar a cantidade sobre a asistencia real, a cantidade non é un problema de número de enfermos, o problema é o número de profesionais habilitados para poder tratar a esos enfermos e que son necesarios. A miña postura propia como médico e como concelleiro de Sanidade é que non só é importante atender aos pacientes senón atendelos nunhas condicións que sexan óptimas; que ao final o paciente teña que desprazarse o menos posible para facerse unha proba ou diagnóstico”.
O alcalde de Ribeira, Luís Pérez Barral, xunto cos concelleiros e concelleiras do goberno, quixo mostrar o seu apoio firme e contundente a esta xusta demanda cidadá. “Dende o goberno local imos estar a
carón da xente de Aguiño e, como alcalde, estou, e sempre estarei, a carón da veciñanza nesta loita por unha atención sanitaria digna. Non é aceptable que os veciños e veciñas teñan que estar agardando até tres semanas ou máis para que os atenda o seu médico de cabeceira”, declarou.
O rexedor local insistiu en que a Administración Municipal non escatimará esforzos e ponse á disposición da Consellaría de Sanidade para poder solucionar a este problema, afirmando que “a saúde non pode ser unha cuestión secundaria, é un dereito básico que debe ser garantido sen excepcións e con medidas que garantan a atención digna”. Pérez Barral informou que o vindeiro luns haberá dúas médicas en Aguiño pero tamén lembrou que segue existindo un problema xa que no centro de saúde de Ribeira faltan 5 dos 14 médicos que debería haber.
A entrega das sinaturas simboliza o compromiso e a unión da veciñanza de Aguiño na loita por un sistema sanitario máis xusto e eficiente. Pérez Barral deu os parabéns á veciñanza por defender tan dignamente os seus dereitos fundamentais e incidiu en que o concello apoiará as acción destinadas a lograr este obxectivo pero tamén poñéndose a disposición do Servizo Galego de Saúde para colaborar no que sexa preciso.
“Este goberno municipal é un aliado dos nosos veciños e veciñas para que se garanta unha atención sanitaria pública, universal e de calidade”, concluíu o alcalde.