Camariñas presentará a súa campaña turística e a a XXXIV Mostra do Encaixe en Madrid, na Feira Internacional de Turismo ‘Fitur’ 2025

Sandra Insua presentará o xoves 23 de xaneiro, no stand de Turespaña, a campaña turística para 2025 e a trixésimo cuarta edición da Mostra.

O vídeo turístico e o cartel da Mostra lucirán nas pantallas de Callao e Gran Vía e tamén nas do Mercado de San Miguel durante toda a semana.

Tamén se estreará en Fitur a camiseta oficial da Mostra, deseñada por Esteban Freiría.

 

O Concello de Camariñas volve, outro ano máis, á Feira Internacional de Turismo (FITUR) que se celebra en IFEMA (Madrid) para presentar, o próximo xoves ás 17:30 horas no stand de Turespaña, a súa campaña turística para este ano e a XXXIV Mostra do Encaixe de Camariñas Deputación da Coruña.

 

A alcaldesa de Camariñas, Sandra Insua, será a encargada de dar a coñecer o vídeo turístico promocional e o motivo escollido para o cartel desta edición da Mostra, que se celebrará en Semana Santa do 17 ao 20 de abril.

 

A rexedora avanza que “tanto o vídeo como o cartel están moi ligados á nosa terra e á nosa tradición, pola súa temática e porque están feitos e protagonizados por veciños de Camariñas e da Costa da Morte”. “Estou desexando que chegue o momento de que se faga público, seguro que vai a gustar”, afirma.

 

Pantallas no centro de Madrid

 

Como ven sendo habitual nos últimos anos, e co obxectivo de contribuír á promoción turística do evento e do municipio, a XXXIV edición da Mostra lucirá en pleno centro de Madrid. Así, aproveitando a presencia en FITUR, o Concello programou que durante toda a semana se proxecte o vídeo turístico nas grandes pantallas dixitais de Callao e Gran Vía e nas do frecuentado Mercado de San Miguel, onde tamén se verá o cartel da Mostra.

 

O obxectivo desta acción publicitaria é o de continuar a promocionar o turismo en Camariñas fora das nosas fronteiras, xunto á Mostra do Encaixe, para atraer un maior número de visitantes ao longo de todo o ano.

 

Máis accións promocionais

 

Como novidade deste ano, aproveitarase a presentación no stand de Turespaña para dar a coñecer a camiseta oficial da trixésimo cuarta edición da Mostra, que este ano volverá a estar deseñada polo deseñador galego aficando en Marbella, Esteban Freiría.

 

Ademais, dentro da axenda que a expedición de Camariñas ten prevista para Fitur, está marcada unha reunión no stand da Comunidad de Madrid con representantes do Ayuntamiento de Valdemorillo, para estudar unha posible colaboración entre os dous municipios, unidos pola tradición do encaixe e das palilleiras.