O concelleiro de Urbanismo anuncia que o goberno de Sanmartín solicitará a declaración da totalidade do municipio de Santiago como zona residencial tensionada

O concelleiro de Urbanismo, Vivenda e Cidade Histórica, Iago Lestegás, compareceu hoxe acompañado de algúns membros do Grupo de Estudos Territoriais da Universidade da Coruña para presentar o resultado da Diagnose da situación e tensionamento do mercado residencial no municipio de Santiago de Compostela. Como principal conclusión, o concello cumpre en todo o seu territorio dous dos criterios para solicitar a declaración de mercado tensionado, con cal o goberno que preside Goretti Sanmartín activará o resto de pasos para pedir esta media que, en definitiva, suporá regular o prezo do aluguer.

Presentación do resultado do estudo para a declaración do mercado tensionado

Na rolda de prensa, Lestegás destacou o rigor metodolóxico e a claridade dos resultados do estudo feito polo grupo investigador e agradeceu publicamente o gran traballo que realizou. “A diagnose realizada polo Grupo de Estudos Territoriais da Universidade da Coruña confirma con rotundidade que o municipio de Santiago de Compostela cumpre os requisitos para ser declarado na súa totalidade zona de mercado residencial tensionado”, proclamou Lestegás. Canda el compareceu Raimundo Otero Enríquez, que debullou os datos do estudo, e estiveron presentes Estefanía López Salas e Alberto Rodríguez Barcón.

O concelleiro de Urbanismo e Vivenda indicou que o obxectivo principal do estudo era coñecer se o municipio cumpre os requisitos para ser declarado zona de mercado residencial tensionado, mais avanzou que poderá “ser útil tamén para orientar outras decisións”.

“O resultados presentados polo Grupo de Estudos Territoriais evidencian de forma clara e inequívoca que o municipio de Santiago de Compostela cumpre os requisitos para ser declarado na súa totalidade zona de mercado residencial tensionado e así llo solicitaremos formalmente á Xunta de Galicia, que é a administración competente para facer esa declaración”, concluíu Lestegás.

A lei polo dereito á vivenda establece que para a declaración dunha zona de mercado residencial tensionado debe producirse polo menos unha das catro circunstancias recollidas na lei e o noso municipio na súa totalidade cumpre dúas delas: o custo medio do alugueiro máis os gastos e subministracións básicas supoñen máis do 30% da renda media dos fogares; e a taxa de variación acumulada do prezo medio do alugueiro nos últimos cinco anos supera en máis de tres puntos porcentuais o incremento do IPC. Concretamente, cuantifícase un incremento do alugueiro medio do 46,2% mentres o IPC aumentou o 20,8%. Duplícase practicamente o limiar de tensionamento, que é do 23,8%.

O alugueiro é o que tensiona o mercado

Lestegás explicou que, tal e como adiantou nunha intervención no pleno de xullo, os resultados definitivos do estudo “confirman que o que máis tensiona o mercado residencial en Santiago de Compostela é o alugueiro”. O concelleiro de Vivenda tamén explicou que o estudo detectou que o tensionamento producido tanto polo peso da hipoteca como polo peso do alugueiro na renda dos fogares é maior nas zonas do noso municipio que teñen menores niveis de renda. Por tanto, Lestegás advertiu que hai “unha relación directa entre tensionamento do mercado residencial e vulnerabilidade socioeconómica”.

Unha vez que contamos coa diagnose, indicou Lestegás, “o departamento de Urbanismo e Vivenda elaborará o proxecto de plan específico coas medidas correctoras que a Xunta esixe que redacten os concellos, pese a que a lei polo dereito á vivenda no seu artigo 18 di que debe facerse cargo da súa redacción ‘a administración competente’”. En todo caso, o goberno de Santiago fará este proxecto e, en canto estea rematado, constituirá a mesa sectorial de vivenda, previsiblemente no primeiro trimestre do ano.

“A declaración dun ámbito territorial como zona de mercado residencial tensionado implica tamén a realización dun trámite de información no que deberá poñerse a disposición pública a información sobre a que se basea tal declaración, que conforme á normativa da Xunta será despois da mesa sectorial”, engadiu o edil. Deste xeito, o Concello someterá a información pública a diagnose realizada polo Grupo de Estudos Territoriais para que sexa consultada.

Lestegás incidiu en que o proceso “non é sinxelo” e que a Xunta “quixo complicalo aínda máis” cos requisitos que se lles puxeron aos concellos. Non obstante, defendeu que o Concello de Santiago avanza “de acordo coa folla de ruta prevista, realizando con rigor os sucesivos trámites esixidos por outras administracións e seguirá dando todos e cada un dos pasos necesarios para solicitarlle formalmente a declaración do municipio na súa totalidade como zona de mercado residencial tensionado”.

Indicadores

As sección censuais con menor nivel de renda por fogar se corresponden con Belvís e Quiroga Palacios (26.571€), Vite – Avenida de Castelao (27.758€) e Home Santo (27.882€). En contraste, as de maior nivel de renda son Hórreo (51.630€), Montero Ríos (49.798€) e Praza de Galiza (49.417€) -todas no Ensanche-. A renda media neta por fogar na zona máis rica de Santiago case duplica a da máis pobre e entre elas hai unha diferenza de máis de 25.000€.

Para o segundo indicador (custo medio do aluguer e gastos básicos en relación á renda media dos fogares), o municipio no seu conxunto cumpre as condicións para ser declarado zona de mercado residencial tensionado (porque supera o 30% que establece a Lei). Ademais, 44 das 75 seccións censuais individualmente superan ese valor, sendo as máis tensionadas Belvís e Quiroga Palacios (40,9%), Vite – Avenida de Castelao (40,1%) e Home Santo (40%).

Se nos centramos no cuarto indicador, o que compara o incremento do alugueiro co incremento do IPC en Galcia nos últimos cinco anos, o municipio no seu conxunto tamén cumpre amplamente as condicións para ser declarado zona de mercado residencial tensionado. Todas as áreas en que se dividiu o municipio para facer a diagnose superan individualmente ese 23,8% e catro delas superan o 50% de incremento do prezo medio do alugueiro por metro cadrado entre 2018 e 2023: San Pedro e Leste (59,1%), Vite e Norte (56,8%), Vista Alegre e Noroeste (54,2%) e Fontiñas e Nordeste (53,5%).