Paderne, escenario dunha proba de orientación este sábado

 O evento ‘Orientación Ano Novo’ desenvolverase a través dun adestramento balizado, un rogaine nocturno e unha proba de media distancia

 Está organizado polo Club Orientación O Pasatempo de Betanzos

Paderne converterase este sábado, 11 de xaneiro, no escenario dunha proba de orientación. O evento ‘Orientación Ano Novo’, organizado polo Club Orientación O Pasatempo de Betanzos, desenvolverase a partir de tres probas: un adestramento balizado, un rogaine nocturno e unha proba de media distancia.
O sábado pola mañá celebrarase o adestramento balizado. Mentres, a partires das 14:30 horas comezarán as saídas da Media Distancia de Nadal de Paderne. A meta da proba pechará ás 17:00 horas, 60 minutos antes do inicio do Rogaine Nocturno, que contará con modalidades de unha, dúas ou tres horas.
O Telleiro será a zona de concentración e accesos para un evento no que as persoas interesadas puideron anotarse ata o pasado martes, fosen ou non iniciadas ao deporte.
O mapa da proba foi realizado por David Casado Bravo. De xeito orixinal, deseñouse para o Campionato de España de Rogaine de hai xa varios anos, pero foi revisado o pasado mes. A zona actual non foi nunca usada para a orientación a pé, polo que se pode considerar que será unha nova área con gran diversidade de terreos que dá lugar a un mapa labiríntico con abundancia de camiños.
A organización sinala que para optimizar os trazados, os deportistas deberán navegar polos bosques de Paderne ou seguir outras referencias lineais como muros.