O albergue de Neda bate no 2024 o seu propio récord de peregrinos hospedados

Por segundo ano consecutivo, o albergue de peregrinos de Neda supera a barreira dos 3.000 hóspedes. A suba experimentada polo Camiño Inglés ao longo do 2024 plasmouse nos datos de ocupación da infraestrutura turística, integrada na rede pública e xestionada polo Concello, que marcou un novo récord absoluto de peregrinos aloxados, superando os 3.800.
Ao teor das estatísticas ofrecidas pola Oficina do Peregrino, a ruta de peregrinación que parte do peirao de Curuxeiras e discorre por ata seis municipios de Ferrolterra, entre eles Neda, e do Eume alcanzou no 2024 rexistros históricos. Un total de 28.058 persoas – case 4.000 más que no ano anterior- completaron durante os últimos dos meses este itinerario Xacobeo, consolidado xa como cuarta opción dos romeiros que van a Santiago.
Nesta liña, aumentaron os peregrinos que pasaron por Neda. Así, aos 26.780 que saíron da cidade naval (un 16 % máis que no ano anterior), cómpre engadir os 259 que decidiron iniciar a ruta na nosa vila. E en paralelo, se disparou a cifra dos que decidiron facer noite no albergue nedense.
E así, se no 2023 foron 3.303, o que supuxo un incremento do 14% con respecto ao exercicio precedente, no ano que vimos de pechar contabilizáronse nada menos que 3.842, unha suba do 16%, paralela á experimentada polo propio Camiño Inglés. Como é habitual, os meses de maior ocupación foros os do verán, con xullo á cabeza. Os peregrinos estranxeiros representan xa o 48,6 %, destacando os italianos, portugueses e alemáns.
O albergue abre todos os días do ano, completándose as 26 prazas dispoñibles (24 en liteira e 2 camas para persoas con mobilidade reducida) por orde de chegada. Cómpre rexistrarse chamando ao 659684435.
O Camiño Inglés tense convertido nun dos piares da oferta turística de Neda. E así, co obxectivo de mellorar a experiencia do peregrinos, o Concello optaba por situar a caseta de información turística ao pé do albergue. Ademais, da man de Turismo de Galicia, a administración local procedía á restauración dos pavimento das rúas centrais do casco histórico polas que discorre o itinerario de peregrinación.