Un total de 36 centros educativos intercambian boas prácticas docentes na fase autonómica do programa Observa_Acción

A Xunta impulsa desde hai dez cursos esta iniciativa baseada na observación do traballo na aula que permite as docentes coñecer outras realidades e replicalas

Favorécese o traballo en equipo do profesorado con intereses compartidos e mesmo se abre a porta á colaboración con centros doutras CCAA ou países

Un total de 36 centros educativos galegos intercambiarán boas prácticas docentes ao abeiro da fase autonómica do programa Observa_Acción da Xunta, unha iniciativa impulsada pola Consellería de Educación, Ciencia, Universidades e FP que fomenta a aprendizaxe conxunta entre o profesorado a través do intercambio de experiencias e a observación entre iguais.

 

O programa, moi valorado polo profesorado, configúrase como un modelo de formación baseado na observación tanto a nivel interno dos propios centros como en colaboración con outros de dentro e de fóra de Galicia. Isto permite aprender novas estratexias de ensinanza, novos enfoques pedagóxicos e xestión da aula. Isto é, a través da súa participación no programa, os docentes coñecen e comparten outras realidades educativas que despois poden aplicar nos seus colexios e institutos.

 

Internacionalización

En concreto, o intercambio permite experimentar novas vías de formación do profesorado e favorecer a innovación educativa nos centros, ao tempo que se facilita aos docentes a posibilidade de observar de forma directa metodoloxías nos procesos de ensino-aprendizaxe, xeitos de relación e comunicación ou vías de xestión dos recursos propios e alleos que desenvolven outros centros e impúlsase o traballo en equipo.

 

Ademais, favorece a internacionalización na medida en que se abren as portas a proxectos transfronteirizos, tecendo redes de intercambio tanto entre docentes como entre equipos directivos de centros con proxectos comúns que propician o apoio mutuo e permanente.

 

Dúas fases do programa

O programa, enmarcado nas accións de formación do profesorado do Goberno galego, organízase nun itinerario de dous cursos escolares. Ao longo do primeiro curso, desenvólvese a fase autonómica, que vén de resolverse agora e que é obrigatoria para todos os centros participantes. Esta fase divídese á súa vez na etapa Comparte, de observación entre docentes do mesmo centro educativo, e a etapa Acolle, de observación entre centros da nosa comunidade.

No segundo curso desenvolverase a fase interautonómica ou Fase Internacional sendo voluntaria para os centros que a elixan. Na fase interautonómica, a observación realizarase entre equipos docentes con centros educativos doutras comunidades autónomas (Castela e León, Madrid, Estremadura, Aragón, A Rioxa, Murcia e Cantabria) e na fase internacional a observación consistirá na colaboración con centros educativos doutros países asociados (Escocia, Francia, Portugal, Italia, Finlandia, Estonia, Lituania e Alemaña, entre outros).

Os centros seleccionados para a fase autonómica son os reflectidos na seguinte táboa:

PROVINCIA DA CORUÑA
AMES	CEIP A Maía
AMES	CEIP Agro do Muíño
CAMBRE	CEIP Plurilingüe Graxal
CAMBRE	CEIP Portofaro
CERDIDO	CEIP da Barqueira
CORISTANCO	CRA A Tarandeira
CULLEREDO	CEIP Plurilingüe Vila de Rutis
CULLEREDO	IES Eduardo Blanco Amor
FERROL	IES Concepción Arenal
MAÑON	CEIP Francisco López Estrada
NARÓN	CEIP Plurilingüe Ponte de Xubia
ORDES	CEIP Campomaior
PADRÓN	CRA de Dodro Padrón
POBRA DO CARAMIÑAL	EEI Fernández Varela
PONTECESO	IES Eduardo Pondal
PONTEDEUME	CEIP Plurilingüe de Andrade
RIANXO	CRA de Rianxo
SANTIAGO DE COMPOSTELA	CEIP Plurilingüe de Vite
ZAS	IES Maximino Romero de Lema
PROVINCIA DE LUGO
ANTAS DE ULLA	CEIP Plurilingüe Antas de Ulla
BALEIRA	CEIP Plurilingüe Concepción López Rey
GUITIRIZ	CEIP Plurilingüe Lagostelle
NADELA	CEIP Plurilingüe de Nadela
RIOTORTO	CEIP de Riotorto
VILALBA	CEIP Terra Chá
PROVINCIA DE OURENSE
RIÓS	CEIP Plurilingüe das Vendas da Barreira
PROVINCIA DE PONTEVEDRA
A ESTRADA	CEIP Cabada Vázquez
BAIONA	IES Primeiro de Marzo
BUEU	CEIP Plurilingüe A Pedra
FORCAREI	CEIP de Soutelo de Montes
FORNELOS DE MONTES	CEIP Doutor Suárez
MARÍN	CEIP Plurilingüe do Carballal
SANXENXO	CEIP Plurilingüe Nantes
SILLEDA	IES Plurilingüe Pintor Colmeiro
VIGO	CIFP Manuel Antonio
VIGO	EEI Rúa Hernán Cortés

 

Un programa consolidado

Tras varios anos de funcionamento, o programa Observa_Acción consolídase con máis de 2.658 profesores e 399 centros participantes. A iniciativa implantouse por primeira vez, con carácter experimental, no curso 2016-17, con seis centros e 30 profesores. Instaurábase así unha nova vía de innovación educativa con intercambios entre docentes de distintos centros co fin de facilitar que observaran de forma directa metodoloxías, enfoques didácticos nos procesos de ensino-aprendizaxe, formas de relación e comunicación ou vías de xestión dos recursos propios e alleos que se desenvolven en colexios e institutos diferentes ao seu, fomentando a aplicación do aprendido despois nas súas aulas.