Máis de 5.500 persoas correrán mañá para pechar o ano na San Silvestre da Coruña 

A carreira, que dará comezo ás 17.00 horas no Parrote, percorrerá lugares icónicos como a Torre de Hércules, o Paseo Marítimo e a Praza de María Pita 

Nesta edición entregóuselle un recoñecemento especial a Ferenc Szabo, deportista profesional do Club Halterofilia Coruña 

A Coruña acollerá mañá, martes 31 de decembro, unha nova edición da San Silvestre, consolidada como un dos eventos máis emblemáticos da cidade. . O concelleiro de Deportes, Manuel Vázquez, presentou hoxe a xornada que contará cunha participación de récord superando os 5.500 inscritos. “Esta carreira non só é unha competición, senón tamén unha festa para toda a familia,” destacou Vázquez. 

Os participantes poderán escoller entre correr, camiñar, practicar marcha nórdica ou mesmo participar coas súa mascotas e amigos. Ademais, nesta edición a proba destaca pola súa alta representación feminina, cunha participación de case o 50% de mulleres na categoría absoluta. A carreira, que dará comezo ás 17.00 horas no Parrote, percorrerá lugares icónicos como a Torre de Hércules, o Paseo Marítimo e a Praza de María Pita. 

O edil destacou o carácter internacional da edición, con participantes procedentes de diversas partes do mundo. De acordo cos datos de inscrición, achegaranse corredores e corredoras de países europeos como Francia, Italia e Portugal, así como de rexións máis afastadas como América Latina e Asia. Tamén unha alta representación de corredores e corredoras de fóra de Galicia, de acordo coa liña do Goberno de Inés Rey de posicionar as competicións deportivas como atrativo turístico e dinamizador económico da cidade. 

Doutra banda, un dos compoñentes da San Silvestre é o seu compromiso solidario. A iniciativa “Corre e colabora” permitirá aos participantes doar alimentos destinados á Cociña Económica e Cáritas A Coruña. As doazóns poden entregarse os días 29 e 30 de decembro na Casa da Auga, coincidindo coa recollida de dorsais, ate hoxe ás 21.00 horas. Non se entregarán dorsais mañá, día da proba.

Nota de Prensa 

Vázquez destacou o traballo do equipo do Servizo Municipal de Deportes na organización desta proba de gran magnitude. Ademais, animou a máis persoas a participar e a sumar forzas nun evento que combina deporte, solidariedade e alegría: “A San Silvestre é unha ocasión para gozar da nosa cidade e despedir o ano dun xeito saudable e divertido,” comentou. 

A San Silvestre 2024 destaca pola súa diversidade de categorías, pensadas para que todos e todas poidan participar. A categoría ‘Chupete’ está dedicada aos máis pequenos, promovendo o deporte desde as primeiras idades nun ambiente lúdico e familiar. Por outra banda, a CanSilvestre permite que os amantes dos animais poidan competir acompañados das súas mascotas e a categoría de Marcha Nórdica consolídase como unha excelente opción para aqueles que prefiren unha actividade menos competitiva pero igualmente saudable e inclusiva, reafirmando o carácter accesible e diverso desta carreira. 

Ademais, como novidade o Oysho Running Club participará este ano como equipo de lebres, axudando aos corredores e corredoras a manter un ritmo constante e a alcanzar os seus obxectivos de tempo, engadindo un compoñente técnico e profesional á proba. 

Afeccións ao tráfico 

A San Silvestre traerá consigo diversas alteracións ao tráfico na cidade: 

De 16.30 a 17.30 horas: Desvíos no Cantón Pequeno cara Santa Catalina e Entrexardíns, cortando o tráfico en dirección Porta Real; na Praza de Pontevedra, desde o túnel Juana de Vega/Regidor Somoza, non se permitirá o xiro cara á Comandante Fontanes, excepto para residentes no tramo C/Orzán e Cordelería anterior á Rúa Alta.; e no Paseo Marítimo, sentido Rubine a Modesta Goicouría, o tráfico desviarase pola Praza de Pontevedra. 

De 16.30 ata o paso da carreira: Corte no Paseo Marítimo (sentido próximo ao mar) desde a glorieta de Ánimas ata rúa Alta; peche do aparcadoiro do Aquarium ate as 17.50 horas (aprox.), apertura do tramo desde a Avenida de Hércules sobre as 18.15 horas e reapertura do paso polo Castelo de San Antón estimada ás 18.25 horas. 

Ademais, suspenderase a parada de taxis nos Cantóns entre as 16.30 e as 17.30 horas.