As obras, propostas para adxudicar a Abeconsa e Canarga, comezarán no primeiro trimestre de 2025
O Concello da Coruña avanza nos trámites previos ao inicio das obras de reurbanización dos Cantóns, a fase cero da apertura dos terreos portuarios á cidade. Esta intervención, clave para o Goberno de Inés Rey, contará cun investimento de máis de seis millóns de euros co obxectivo de remodelar e ampliar os espazos peonís entre Juana de Vega e a sede da Autoridade Portuaria.
Este xoves publicouse a licitación do contrato do servizo de asistencia técnica para a dirección da obra, cun orzamento de 142.000 euros, IVE incluído. Con este paso, o Concello completa os trámites previos logo de propor a Mesa de Contratación a adxudicación dos traballos a Abeconsa e Canarga e licitarse o servizo de asistencia técnica para definir o plan de seguridade e saúde dos traballos.
Unha vez finalizada esta fase de preparación, durante o primeiro trimestre do ano está previsto que comence a actuación, dando comezo os traballos no prazo dun mes desde a sinatura do contrato. “O Goberno de Inés Rey continúa avanzando na segunda gran modernización da Coruña con obras de gran calado e simbolismo para a cidadanía como esta dos Cantóns, que suporá o comezo da transformación da fachada marítima”, indicou José Manuel Lage, concelleiro de Economía e Planificación Estratéxica.
As medidas como a ampliación dos espazos peonís sumaranse outras como a nova bancada que se habilitará sobre o aparcadoiro dos Cantóns, un enclave concibido como un futuro punto de encontro e reunións para a cidadanía.
Ademais, aproveitando a intervención, o Concello mellorará e ampliará o carril bici que bordea os xardíns de Méndez Núñez para que pase a ser bidireccional, conectándoo co novo percorrido xa habilitado entre a rúa Nova e o paseo marítimo do Orzán, sendo este último o primeiro treito que atravesa o istmo da Pescaría.
Por outra banda, tamén se acometerá a peonalización de Entrexardíns, unha iniciativa enmarcada no plan de recuperación da fachada marítima. Así, os xardíns de Méndez Núñez volverán estar unidos, cunha continuidade peonil entre os seus espazos naturais e a explanada contigua ao Palco da Música.
