O Concello completa dúas novas intervencións de mellora en Agrela, sumando espazos de estacionamento e áreas verdes nas rúas Gambrinus e Pasteur

En paralelo, avanzan as obras de construción da nova glorieta que permitirá mellorar os accesos ao polígono no cruzamento entre a avenida de Fisterra e Gambrinus, traballos cofinanciados con fondos Next Generation

O Concello completou estes días dúas novas intervencións de mellora nos espazos públicos do polígono de Agrela, onde se levaron a cabo cadansúas actuacións nas rúas Gambrinus e Pasteur, atendendo ás peticións da Asociación de Empresarios de Agrela, que tivo implicación tanto no deseño como na execución das intervencións.
“En liñas xerais, o que fixemos foi humanizar e darlles unha ordenación ás superficies sobre as que se actuou, delimitando as prazas de estacionamento, creando beirarrúas accesibles e aproveitando para crear espazos verdes onde se plantará arboredo”, indicou a concelleira de Infraestruturas e Mobilidade, Noemí Díaz.

No caso da rúa Pasteur, as superficies de parterre nas que se actuou —situadas preto do cruzamento coa rúa Arquímedes— estaban a ser usadas como aparcadoiros alegais, o que tamén supoñía inconvenientes tanto para as persoas viandantes como para os vehículos ao seu paso pola explanada. Agora, creáronse 12 prazas de estacionamento, xa delimitadas, sobre pavimento de lousa-céspede, que permite manter a permeabilidade do terreo. Ademais, nos espazos lindeiros xa se plantaron varios exemplares de arboredo.

Xa no referente á rúa Gambrinus, onde se actuou fronte ao cruzamento coa rúa Cesuras, incrementáronse en tres as prazas de estacionamento —eran dez e agora pasaron a ser 13—, tamén sobre pavimento de lousa-céspede, creouse un novo percorrido peonil con beirarrúas accesibles e tamén se lle deu forma a un pequeno espazo verde onde se plantaron novas árbores.
As actuacións, das que só restan detalles asociados ao axardinamento, executáronse a través de dous contratos menores adxudicados ás firmas Rodríguez Pereira Proyectos y Obras e tamén a Lopez Quinteiro. En conxunto, o investimento total foi de case 100.000 euros.

“Imos, paso a paso, adaptando enclaves do polígono onde había marxe de mellora en termos de accesibilidade e delimitación tanto dos espazos de estacionamento como dos percorridos peonís”, apuntou Díaz, que lembrou que xa o ano pasado se actuou na rúa Galileo Galilei cunha perspectiva semellante.

Ademais, Díaz apuntou a outros dous importantes investimentos do Concello na contorna do polígono, que permitirán mellorar os accesos a Agrela desde a avenida de Fisterra: a construción das dúas novas rotondas previstas nos cruzamentos coas rúas Gutenberg e Gambrinus, ambas cofinanciadas con fondos Next Generation, cun orzamento de máis de 780.000 euros, en conxunto. No caso da glorieta con Gambrinus, as obras xa están en execución.