A ANPA do colexio Bergantiños realizou unha intervención no pleno previa ao debate da moción conxunta do BNG e o PSOE

As necesidades de persoal do centro escolar e os orzamentos para o 2025 centraron a última sesión do ano

As demandas da comunidade educativa do CEIP Bergantiños polarizaron o último pleno do ano, no que tamén foron aprobados os orzamentos para o 2025. Dúas cuestións de tanta relevancia alongaron dúas horas e media a sesión, que comezou cun minuto de silencio pola última vítima da violencia machista en Galicia.

Xa desde media hora antes do pleno puideron escoitarse as reivindicacións das familias do alumnado na Praza do Concello, onde se celebrou unha concorrida concentración á que se sumaron os concelleiros e concelleiras do BNG e o PSOE, os dous grupos que asinaron, a proposta da ANPA, unha moción con dúas peticións dirixidas á Consellería de Educación: a adaptación do cadro de persoal do CEIP Bergantiños á realidade do centro, que ten entre un 35 e un 43% de alumnado con necesidades especiais ou específicas de apoio, incorporando os/as profesionais precisos/as, e a dotación dos recursos necesarios para desenvolver o Plan Xeral de Atención á Diversidade para poder dar resposta ás necesidades da totalidade do alumnado.

A proposta contou co voto a favor dos dous partidos asinantes, mentres que o PP abstívose. Previamente, a presidenta da ANPA tivera a oportunidade de falar no pleno no nome das familias. A súa intervención, que podedes ver e escoitar AQUÍ, foi moi aplaudida polos pais e nais presentes no salón de sesións e tamén polos concelleiros e concelleiras nacionalistas e socialistas. Hoxe o alcalde, Evencio Ferrero, reiterou o apoio do goberno municipal ás familias participando con elas na última concentración do ano ás portas do colexio.

Acordos do pleno
• Acta da sesión anterior. Aprobada por unanimidade.
• Corrección do acordo de denominación de rúas en Carballo. Aprobación definitiva por unanimidade.
• Aprobación de recoñecemento de obrigas de exercicios anteriores. Aprobada con 18 votos a favor e 2 abstencións.
• Cadro de persoal do Concello de Carballo para o exercicio 2025. Unanimidade.
• Orzamento xeral do Concello de Carballo para o exercicio 2025. Aprobación inicial cos votos a favor do BNG, as abstencións do PSOE e os votos en contra do PP.
• Recoñecemento de compatibilidade solicitada polo traballador municipal coa categoría de profesor de saxofón do CMUS do Concello de Carballo, para a realización dunha segunda actividade no sector privado. Unanimidade.
• Plan Provincial de Cooperación ás Obras e Servizos de competencia municipal (Plan único de concellos) “POS+2024” da Deputación Provincial da Coruña. POS+Adicional 1/2025 para o financiamento de gastos sociais extraordinarios. Unanimidade.
• Moción conxunta dos grupos municipais do BNG e PSOE, para solicitar da Consellería de Educación recursos necesarios para desenvolver o Plan Xeral de Atención á Diversidade, a instancia da ANPA A Granxa do CEIP Bergantiños. BNG e PSOE votaron a favor e o PP abstívose.