Miño propoñerá a ampliación do programa Xantar na Casa

O goberno local levará este xoves a pleno a proposta para ampliar o convenio ata o ano 2028, actualizando os prezos

Este servizo permite que as persoas maiores e dependentes poidan seguir vivindo nos seus fogares e mantendo unha autonomía aceptable

O Concello de Miño propoñerá este xoves, 19 de decembro, nun pleno ordinario (20 horas) a renovación ata o 2028 do convenio de colaboración co Consorcio Galego de Servizos de Igualdade e Benestar, aumentando o número de prazas dispoñibles a 15 e actualizando os prezos.

A día de hoxe son 10 as persoas do municipio que se benefician deste programa, que permite que as persoas maiores e dependentes que non poden valerse por se mesmas para cubrir as necesidades básicas relacionadas coa compra e elaboración de menús adecuados ás súas condicións de saúde poidan seguir vivindo nos seus fogares e mantendo unha independencia e autonomía aceptables.

O prezo para as persoas usuarias pasará a ser de 1,93 euros euros por día, e o resto do prezo total (7,32 euros) seguirá cofinanciado polo Concello que achega 1,93 euros e o Consorcio 3,46 euros. Por tanto os custos ao mes para as persoas usuarias serán de 54,04 euros se a repartición é de 4 semanas e de 67,55 euros se é de 5 semanas.

Os menús serán completos e equilibrados, variados e adaptables ás necesidades das persoas usuarias, aos seus gusto e hábitos, así como á gastronomía local e á época do ano. Cada menú inclúe primeiro prato, segundo prato e sobremesa. Entregaranse nun único día á semana ás persoas beneficiarias, que recibirán no seu domicilio sete bandexas diferentes coa comida para cada día da semana.