— O secretario xeral de Universidades e a directora da Axencia Galega de Innovación visitan este centro da UDC, que conta con máis de 230 investigadores
— Os representantes da Consellería de Ciencia e Universidades tamén visitan o Centro de Innovación Tecnolóxica en Edificación e Enxeñería Civil (CITEEC), que se incorpora este ano como centro colaborativo á Rede CIGUS
O secretario xeral de Universidades, José Alberto Díez, e a directora da Axencia Galega de Innovación, Carmen Cotelo, visitaron hoxe o Centro de investigación en Tecnoloxías da Información e Comunicación (CITIC), da Universidade da Coruña (UDC), para coñecer o seu funcionamento e liñas de investigación. Este centro, que a Xunta de Galicia apoia cunha achega de máis de 2M€, pertence a Rede CIGUS de excelencia científica de Galicia, conformada por 13 centros (10 excelentes e tres na nova categoría de colaborativos).
Os representantes da Consellería de Educación, Ciencia, Unviersidades e FP, no marco das visitas conxuntas que están realizando aos centros de investigación e tecnolóxicos para coñecer o seu traballo e atender as súas necesidades, destacaron o traballo dos máis de 230 investigadores do CITIC. Todos eles, a través da innovación e o desenvolvemento tecnolóxico, afondan en investigacións relacionadas coa intelixencia artificial, a ciencia de datos, a computación de altas prestacións, as redes intelixentes e a ciberseguridade.
Este centro, no que traballa a investigadora Verónica Bolón que vén de recibir o Premio Nacional de Investigación 2024 na categoría de persoal investigador menor de 40 anos, ten obtido numerosos logros. Entre eles, destaca a consolidación en avances significativos no desenvolvemento de TIC e fomento dunha colaboración exitosa con empresas alleas ao sector, así como a internacionalización das súas investigacións.
Durante a visita, tamén se puxo en valor o apoio do Goberno galego a este centro de investigación que, ademais dos máis de 2M€ que recibiron por parte da Xunta este ano na convocatoria dos centros de excelencia, leva recibido un total de 6,4M€ en diversas convocatorias.
Máis de 800.000 euros para o CITEEC
Tras esta visita, os representantes da Consellería desprazáronse ao Centro de Innovación Tecnolóxica en Edificación e Enxeñería Civil (CITEEC), tamén da UDC, onde desenvolven o seu traballo máis de 90 investigadores.
Este centro foi recoñecido este ano como centro colaborativo da Rede CIGUS, o que supón que está un paso máis próximo de ser nomeado centro excelente en vindeiras convocatorias. Dentro desta liña de axudas, a Xunta de Galicia vén de inxectar ao CITEEC preto de 700.000 euros, que se suman aos convenios de I+D con 20.000 euros e ao de adquisición de equipamento con 112.000 euros, acadando máis de 800.000 euros.
O CITEEC é unha unidade de investigación única en Galicia, e singular no conxunto do Estado, polo seu foco temático e as súas capacidades científico-tecnolóxicas. O seu proxecto científico articúlase ao redor de catro prioridades temáticas: a área de construción e desenvolvemento industrial limpo, a área de cambio climático e xestión de recursos naturais e hídricos, a área de transportes intelixentes e mobilidade sustentable e a área de transición enerxética.
